Este apartado é moi importante porque aquí estades especificando que ides facer, paso a paso. Hai un criterio sinxelo para saber se esta parte está ben elaborada: coa información que proporcionades, calquera persoa que o lea debería poder reproducir o experimento nas mesmas ou similares condicións.
 

Materiais e Métodos no voso proxecto é onde se detalla como se levará a cabo o traballo experimental e que ferramentas se empregarán. O apartado ten dous obxectivos principais: explicar o proceso de investigación de forma clara e, como xa avanzamos,  permitir que outras persoas poidan repetir o experimento para comprobar os resultados.

• Materiais: aquí listamos todo o que precisamos para realizar o proxecto, como instrumentos, reactivos, equipos, ou mesmo aplicacións tecnolóxicas. Por exemplo, se investigades a erosión, poderiades necesitar: terra, auga, recipientes, cronómetro e unha regra. Tamén podemos indicar espazos que imos precisar, por exemplo, o laboratorio do instituto ou o xardín. 
• Métodos: descríbese, paso a paso, como se realizará o experimento ou estudo, asegurando que sexa claro e preciso. Indícase como se usarán os materiais, como se medirán as variables e cal será o deseño experimental. Por exemplo: "Engadir un litro de auga á terra inclinada e medir o tempo que tarda en erosionarse."
  Este apartado debe ser detallado, pero sinxelo de entender, garantindo que alguén máis poida seguir o mesmo proceso con éxito.

Un bo exemplo

Pregunta de investigación: cal é o efecto da luz na taxa de fotosíntese de plantas acuáticas cultivadas lo laboratorio do centro?.

Materiais:
- Plantas acuáticas (como Elodea).
- Frascos transparentes con auga.
- Bicarbonato de sodio (fonte de CO₂).
- Lámpadas con distintas intensidades de luz.
- Luxómetro (para medir a intensidade luminosa).
- Cronómetro.
- Conta-burbullas (ou outro método para medir a produción de osíxeno).

Método:
- Encher tres frascos transparentes con auga e engadir unha culler pequena de bicarbonato de sodio a cada un.
- Colocar un anaco igual de planta acuática dentro de cada frasco.
- Situar os frascos baixo lámpadas con diferentes intensidades de luz (por exemplo, 100 lux, 500 lux, e 1000 lux).
- Deixar que as plantas se aclimaten durante 5 minutos.
- Durante 10 minutos, contar o número de burbullas que a planta produce en cada frasco (indicando o osíxeno liberado durante a fotosíntese).
- Repetir o experimento dúas veces máis para garantir a fiabilidade dos resultados.

Un mal exemplo

Materiais:
- Algunhas plantas acuáticas.
- Uns frascos.
- Algo para engadir CO₂.
- Unhas lámpadas.
- Un cronómetro.

Método :
- Poñer plantas en frascos con auga.
- Colocalos baixo lámpadas con diferentes luces.
- Contar as burbullas que saen durante un anaco.
- Comparar os resultados para ver que pasa.

Está ben claro que, no segundo caso, non temos información para reproducir o experimento porque nin sabemos que planta utilizar, ni cuanto tempo contar burbullas, nin que fonte de luz usar. É unha descrición vaga, moi pouco precisa. 

Lembrade escribir no cadro azul. O verde é para que o profesor ou a profesora faga os comentarios de avaliación e mellora das versións, ate chegar a versión final. 
 

Obviamente, agora non é o momento de describir os resultados e as conclusións. Estamos redactando o proxecto, que define o que imos facer. Máis adiante, cando rematemos, chegará ese momento tan importante nunha investigación: recoller os resultados, resumilos e, a partir deles, chegar ás conclusións.

Por agora, só toca indicar como pensades que ides recoller e traballar cos datos. Quizais, posteriormente, teñades que modificar o plan inicialmente previsto.

Un exemplo

Para un experimento de química sobre o efecto da temperatura na velocidade de disolución do azucre en auga, rexistraremos o tempo necesario para que unha cantidade fixa de azucre se disolva completamente en tres temperaturas diferentes: 20°C, 40°C e 60°C. Os datos serán anotados nunha táboa onde se inclúan as columnas de temperatura e tempo de disolución. Posteriormente, empregaremos un gráfico de liñas para representar a relación entre a temperatura (no eixo X) e o tempo de disolución (no eixo Y). Analizando o gráfico, identificaremos se existe unha tendencia clara, como unha diminución do tempo de disolución a medida que aumenta a temperatura. Estas observacións permitirannos chegar a conclusións sobre como a temperatura afecta a velocidade de disolución, comprobando se coinciden coa nosa hipótese inicial.

Lembrade escribir no cadro azul. O verde é para que o profesor ou a profesora faga os comentarios de avaliación e mellora das versións, ate chegar a versión final. 

Aínda que en Materiais e Métodos xa indicastes o que ides precisar, neste apartado volvédelo a indicar de forma moi resumida, centrando a atención especialmente nos custos dos materiais. Isto é importante para que o profesor ou profesora poida coñecer o orzamento necesario e avaliar a viabilidade do proxecto.

É probable que o profesor ou a profesora indique un orzamento máximo. 

Un exemplo 

Comentarios: 

• Os vasos de precipitado poden substituírse por recipientes domésticos para reducir custos.
• O fogón eléctrico pode ser prestado para minimizar gastos. 
• Quizás moito do material xa exista no laboratorio do instituto. 
• O orzamento total cumpre co límite establecido de 40 Euros.

Lembrade escribir no cadro azul. O verde é para que o profesor ou a profesora faga os comentarios de avaliación e mellora das versións, ate chegar a versión final. 

Indicar as fontes (WEBS, libros, revistas, etc) que ides a usar no proxecto. Só as que ides a usar. Non deben ser moitas. 

• A forma de citar un libro é: 

Bioloxía e Xeoloxía 3º ESO. Editorial Anaya.

• A forma de citar un artigo dunha revista:

González, M., & López, R. (2022). O impacto dos fertilizantes químicos nos ecosistemas acuáticos. Revista Galega de Ciencias, 14(3), 45-52. 

• Se se trata dunha WEB:

Para citar unha web, debes incluír os seguintes elementos básicos: autor ou organización, ano de publicación (se está dispoñible), título da páxina ou artigo, URL e data de acceso (se é necesario). Aquí tes un exemplo:

Organización Mundial da Saúde. (2023). Cambio climático e saúde. Recuperado de https://www.who.int/topics/climate-change/ o 9 de decembro de 2024.

Un exemplo

Imaxinade que no voso proxecto precisades criar caracois e utilizastes un vídeo onde se explica como crialos. Esa fonte debe aparecer na bibliografía, indicando correctamente os datos do vídeo, como o autor ou creador, o título, o ano de publicación, o formato  e o enlace para que calquera poida consultala.

Smith, J. (2021). How to raise and care for snails at home [Vídeo]. Recuperado de https://www.youtube.com/watch?v=example o 9 de decembro de 2024.

Se, por exemplo, tedes un artigo que fala dos caracois na Arxentina, e non o ides a utilizar, NON debe aparecer na bibliografía. Só os que vaiades a precisar. 

Lembrade escribir no cadro azul. O verde é para que o profesor ou a profesora faga os comentarios de avaliación e mellora das versións, ate chegar a versión final.   
 

Facer un proxecto seguro requerirá melloras. Por iso, elaboraredes unha primeira versión que será enviada ao profesor ou profesora. No cadro verde, incluiranse os seus comentarios, loubanzas e propostas de mellora, que vos permitirán redactar unha segunda versión. Esta poderá ser a definitiva ou, se fose necesario, seguiremos traballando para mellorala. No recadro final, iranse anotando as datas das diferentes versións ata chegar á versión definitiva, que vos permitirá iniciar o proxecto.

Tede paciencia porque na redacción de novas versións melloradas estaredes aprendendo moito. 

Este apartado será completado unicamente polo profesor ou profesora.