A memoria de investigación é un documento, redactado polo grupo, onde se recolle todo o traballo realizado do proxecto de investigación. Nela, explícades desde o obxectivo do estudo ata os resultados obtidos e as conclusións finais. Este documento debe incluír os pasos seguidos, os materiais usados e as observacións realizadas. 

O principal obxectivo da memoria de investigación é organizar e compartir os coñecementos adquiridos, permitindo que outras persoas comprendan e incluso repitan o traballo. Tamén serve para reflexionar sobre o proceso, identificar melloras e aportar información útil para futuras investigacións. É unha ferramenta clave para comunicar de forma clara e precisa o esforzo e os descubrimentos realizados.

Como veredes,  a súa estrutura é bastante similar ao proxecto inicial, coa principal diferenza que, neste momento,  non se trata de algo futuro que queredes facer, senón un traballo xa feito e finalizado.  Ides poder aproveitar boa parte do texto redactado no proxecto inicial. 

Se comparades, a estrutura é similar ao proxecto, con algunha diferenza. 

1. Pregunta de investigación (título).
2. Autoría. 
3. Resumo en galego, castelán e ingles. 
4. Introdución.
5. Obxectivos. 
6. Materiais e métodos.
7. Resultados. 
8. Conclusións (discusión).
9. Bibliografía.
10. Agradecementos.
11. Anexos.

A memoria dun proxecto de investigación segue un modelo simple e estandarizado, deseñado para organizar a información de maneira clara e precisa. Non inclúe elementos decorativos, como portadas elaboradas, fotos ou debuxos que non estean directamente relacionados co tema de estudo. O seu formato céntrase os apartados básicos xa indicados. A prioridade é a presentación clara dos datos e do traballo realizado, sen distraccións innecesarias.

O xeito de redactala xa foi especificada nos apartados anteriores dos contidos desta unidade. 

As revistas destinadas a publicar os resultados das investigacións, así como as memorias solicitadas polos organismos que financiaron o traballo, adoitan establecer unhas normas de publicación moi claras. Estas normas non sempre son as mesmas, pero é fundamental que, en cada caso, se revisen con atención e se cumpran de forma escrupulosa.

No noso caso, e co obxectivo de aprender a respectar estas normas, propoñeremos unhas directrices concretas que debedes seguir. Estas pautas axudaranvos a redactar de forma correcta e a comprender a importancia da precisión e do rigor na comunicación científica.

Normas de publicación da memoria

• Tipo de letra: Arial, tamaño 12, con texto xustificado. Empregade negriña unicamente para o título e os capítulos principais (Introdución, Materiais e Métodos, Resultados, etc.).
• Marxes: De 2 cm en todos os lados do documento.
• Interliñado: 1,5 liñas.
• Fotografías, gráficas e táboas:
  • Deben estar numeradas de forma consecutiva.
  • Incluír un pé de páxina que as describa brevemente.
  • Referirse a elas no corpo do texto. Por exemplo: "Na táboa 1 obsérvase a variación de temperatura."