2.8 Disolucións

Unha disolución é unha mestura homoxénea de dúas ou máis substancias. Xa que logo, os seus compoñentes non se distinguen a simple vista e o seu aspecto é uniforme. Hai disolucións por todas as partes: o aire, o sangue, medicinas, carburantes, produtos de limpeza, moedas, etc.

Nas disolucións de dous compoñentes (disolucións binarias), un deles chamámolo soluto e o outro disolvente. Habitualmente coñecemos como disolvente o que está en maior proporción; outras veces o disolvente é o que está no mesmo estado de agregación que a disolución final (por exemplo, en líquido + gas → gas, o disolvente é o gas). Pero non sempre está claro cal é o soluto e cal o disolvente.

Como o soluto e o disolvente poden ser sólidos, líquidos ou gases, temos nove tipos de disolucións posibles:

Estado dos compoñentes		Estado físico da disolución	Exemplos
Soluto	Disolvente
Gas	Gas	Gas	Aire
Líquido	Gas	Gas	Aire húmido, aerosois
Sólido	Gas	Gas	Partículas de po no aire
Gas	Líquido	Líquido	Bebidas gasosas
Líquido	Líquido	Líquido	Gasolina, alcohol sanitario
Sólido	Líquido	Líquido	Azucre en auga
Gas	Sólido	Sólido	Hidróxeno en paladio
Líquido	Sólido	Sólido	Sulfato de cobre pentahidrato, amálgamas
Sólido	Sólido	Sólido	Aliaxes metálicas