2.7 Técnicas de separación de mesturas

Como podemos separar as substancias que forman unha mestura? Moitas veces separámolas usando procedementos físicos, dependendo das propiedades das substancias mesturadas. Vexamos estas técnicas.

• Peneiradura. É útil para separar sólidos mesturados que teñan grans de distinto tamaño. Por exemplo, podemos separar a area fina mesturada con grava, o café da borra, ou o zume de laranxa da polpa.
• Filtraxe. Úsase para separar un sólido insoluble mesturado cun líquido; as partículas sólidas quedan retidas no filtro e o líquido pasa a través del.
• Decantación. Se un sólido é insoluble no líquido e está depositado no fondo do recipiente, podémolos separar inclinando o vaso e derramando o líquido noutro recipiente; os sólidos quedarán no vaso orixinal. Podemos así separar, por exemplo, auga e area, ou sal de limaduras de ferro se antes disolvemos o sal.

A decantación tamén se usa para separar dous líquidos inmiscibles (que non se mesturan entre si), como auga e aceite. Faise cun funil de decantación, como o da figura de abaixo.

• Cristalización. Esta técnica é adecuada cando un sólido se disolveu nun líquido; evaporando o líquido o sólido quedará no fondo do recipiente. Se a evaporación é lenta o sólido formará cristais con formas xeométricas. Este procedemento úsase, por exemplo, para extraer o sal da auga do mar.
• Destilación. Permite separar os líquidos dunha mestura se ferven a temperaturas bastante diferentes. Ao quentar a mestura evapórase antes a substancia que ferve a temperatura máis baixa. O vapor desprendido arrefríase, condensa a líquido e recóllese aparte. Observe como se fai na figura que se xunta abaixo.

Cristalización
Peneiradura	Funil de decantación	Destilación

• Cromatografía. Cando os líquidos dunha mestura teñen diferente solubilidade nun disolvente ou afinidade por un substrato, podemos separalos mediante cromatografía. Hainas de varios tipos: en papel, en columna ... Aquí veremos a máis sinxela: a cromatografía en papel, nunha das actividades seguintes.
• Separación magnética. Está indicada cando un dos compoñentes da mestura é un metal ferromagnético (ferro, cobalto, níquel, etc.). Pódense separar estes metais simplemente pasando un imán pola mestura. Por exemplo, podemos separar así limaduras de ferro mesturadas con limaduras de aluminio.