1.6.2 Dificultades para implantar réximes democráticos

As dificultades de implantación de réximes democráticos en moitos países de África e Asia e nalgúns países de América Latina están relacionadas con condicionantes económicos e sociais. Ao longo do século XX a implantación da democracia en Latinoamérica, Asia e África foi moi difícil; aínda moitos países están sometidos a sistemas ou gobernos que non respectan as liberdades democráticas. Hai condicionantes que dificultan o desenvolvemento de democracias estables:

Condicionantes económicos

• Sectores económicos pouco competitivos, dependencia do exterior e pouca diversificación económica.

• Débedas externas.

• Inflación.

• Baixo desenvolvemento tecnolóxico.

• Fortes déficits públicos.

Condicionantes políticos

• Elevado grao de corrupción, que dificulta a aplicación das leis e o respecto polos dereitos da cidadanía.

• Aparición de movementos revolucionarios, populistas e autoritarios, que provocan unha forte inestabilidade política.

• Rivalidades étnicas e tribais.

• Enfrontamento entre estados por áreas xeográficas de interese económico ou político.

• Existencia de réximes políticos vinculados a un partido único, ditaduras militares ou cunha forte influencia relixiosa.

Condicionantes sociais

• Forte desigualdade social con tendencia á polarización entre unha minoría enriquecida e unha gran maioría que se empobrece progresivamente.

• Desigualdade moi acentuada entre o medio rural e o medio urbano.

• Altos niveis de pobreza: millóns de persoas viven con menos dun dólar ao día.

• Oposicións das oligarquías ás reformas sociais.