5. Glosario

A

• Árbore autóctona

A que forma parte da vexetación natural ou clímax dunha área xeográfica, é dicir, adaptada perfectamente ás condicións climáticas e do solo.

• Armador

Persoa ou entidade que se dedica profesionalmente á explotación comercial dun barco.

C

• Confraría de pescadores

Asociación gremial de mariñeiros.

E

• Especie bentónica

A que vive normalmente no fondo do mar. Adoita presentar adaptacións características, como o corpo plano e gran mimetismo: homocromía.

• Especie peláxica

A que vive en pleno mar. Se se deixa arrastrar polas augas forma o plancto. Se se despraza para buscar o ambiente axeitado recibe o nome de necto.

• Evaporación

Transformación dun líquido en vapor, sen que ferva.

I

• Infiltración

Paso dun líquido a través dun corpo moi lentamente. A infiltración é maior se o terreo é máis permeable.

L

• Lonxa

Edificio no que se vende e merca peixe.

M

• Marea vermella

Conxunto de microorganismos tóxicos mariños -dinoflaxelados- que se reproducen moi axiña en enormes cantidades, se teñen condicións ambientais favorables: temperatura, salinidade, nutrientes. Afecta a moluscos como mexillóns e ameixas.

• Materia orgánica

Substancia que se forma no solo ao apodrentaren os organismos vivos, vexetais e animais.

P

• Patrón de costa

Capitán do barco. É o responsable da dirección do barco.

• Patrón de pesca

Técnico especialista na localización e nas técnicas de captura dos peixes

• Peixe azul

Peixe con moita graxa: xurelo, bocarte, bonito, agulla…

• Peixe branco

Peixe con baixo contido de graxa: faneca, pescada, ollomol...

• Permeabilidade

Propiedade física que teñen certos terreos e rochas de deixaren pasar os líquidos a través de si.

S

• Sobrepesca

Pesca excesiva e incontrolada.