1.4 O sector terciario

O sector terciario ou de servizos abrangue moitas actividades: comercio, transporte, comunicacións, administración, sanidade, educación, deportes, espectáculos, turismo, banca… Nos países máis desenvolvidos o sector de servizos é un referente económico sobranceiro, polo número de persoas empregadas e polo papel que desempeña na economía, pois dirixe e organiza todas as demais actividades humanas.

Os servizos poden ser públicos ou privados. A xestión dos servizos públicos correspóndelles aos gobernantes estatais, autonómicos ou municipais. Os privados dependen de empresas, que os manteñen e explotan. Pode haber centros educativos e sanitarios, transportes, seguridade, entidades financeiras, redes hoteleiras, comunicacións, espazos deportivos e culturais… públicos ou privados.