1.2.7 A minaría en Galicia

Galicia ten grandes reservas de ferro, chumbo, magnesita, titanio e tamén granate, unha pedra semipreciosa. Mención especial merecen as explotacións de rochas: granitos, arxilas e lousas.

O granito é a rocha predominante en Galicia. Desde sempre, explotáronse os depósitos de granito mediante canteiras. É unha rocha dura, pero sofre procesos de meteorización e disgréganse os minerais que a compoñen. Así, o seixo acumúlase en areas nas praias. A mica orixina as arxilas. O feldespato forma caolíns.

As arxilas foron extraídas desde antigo nas barreiras. Con elas fanse tellas ou ladrillos, que se cocen nas telleiras.

Outra rocha abundante, na Galicia oriental, é a lousa, gris ou moura, orixinada pola transformación das arxilas. A explotación da lousa ten importancia económica, pois extráense milleiros de toneladas, que se exportan na maior parte.

Non obstante, esta abundancia de materia prima non se transforma industrialmente en Galicia, senón que se exporta maioritariamente, sen sufrir transformación. Tal ocorre co wolfram, co zinc, co cobre, co seixo e co estaño.