Exipto é a terra dos faraóns, das momias e das pirámides! Atópase no Norte de África e na súa evolución tivo unha importancia capital o río Nilo.

Os períodos históricos en Exipto dátanse por dinastías, e van dende o período Protodinástico (dende o 3500 a. C.) ata o período de dominación romana (dende o 30 a. C.).

A civilización exipcia desenvolveuse ao longo do río Nilo, famoso polos seus crocodilos, que grazas ás súas crecidas anuais permitía que a terra das súas ribeiras fose moi fértil e producira gran cantidade de colleitas. O clima do país é desértico, polo que todas as cidades e templos máis importantes se situaban ao longo do Nilo. No mapa da esquerda podes ver como as únicas zonas verdes son as que seguen o curso do río.

Ao principio Exipto estaba formado por dous territorios ben diferenciados: o Alto e o Baixo Exipto. Porén, os faraóns (e dúas faraonas chamadas Hatshepsut e Cleopatra) foron quen de unificar estes dous territorios baixo o seu dominio. Para representar esta unión crearon unha coroa con dúas partes, cada unha representando un dos reinos: unha coroa branca e de forma alongada chamada hedjet representaba o Alto Exipto; unha coroa vermella chamada deshret representaba o Baixo Exipto. A unión das dúas coroas chamábase sejemty.