Glosario

Relixión

Definición:: Conxunto de crenzas e prácticas elaboradas polo ser humano co obxectivo de explicar a orixe do mundo e de organizar as relacións sociais.
Exemplo:: Na actualidade existen diferentes relixións no mundo.

Politeísmo

Definición:: Crenza en varios deuses e deusas.
Exemplo:: Todas as civilizacións fluviais da antigüidade eran politeístas.

Deus/deusa

Definición:: Ser supremo que ten diferentes poderes e atribucións segundo cada relixión.
Exemplo:: Isis é a deusa nai na relixión do Antigo Exipto.

As crenzas nas civilizacións fluviais

Seguimos coa viaxe no tempo e agora vas coñecer o importante que era a relixión nas antigas civilizacións fluviais. Posteriormente, no teu caderno de aprendizaxe, levarás a cabo unha actividade individual e outra grupal para reflexionar sobre as relixións antigas e as actuais.

Ofrendas e vida

Nas civilizacións fluviais practicábase o politeísmo e as súas persoas habitantes pensaban que os deuses e as deusas interviñan na súa vida, polo que sempre buscaban o seu favor a través de oracións e ofrendas.

Deuses e deusas case humanos

Crían que os deuses e as deusas tiñan un aspecto humano e, nalgunhas civilizacións, como a exipcia, mesturábanse características dos seres humanos e de determinados animais, ademais de posuír unha serie de atributos e poderes que os diferenciaban dos outros.

As persoas representantes das divindades

Consideraban que soamente as persoas gobernantes podían comunicarse con eles e elas, delegando esa capacidade nos sacerdotes e nas sacerdotisas, que eran as persoas encargadas de celebrar o culto e de entregarlle as ofrendas á divindade.

Un instrumento de poder

Como podes imaxinar, a relixión utilizouse nesas civilizacións como un modo de dominar o pobo.

Lectura facilitada

Seguimos coa viaxe no tempo.
Coñecerás as relixións das antigas civilizacións fluviais.
No teu caderno de aprendizaxe compararás as relixións das civilizacións antigas coas actuais.
As civilizacións fluviais eran politeístas.
As súas persoas habitantes levaban a cabo oracións e ofrendas aos deuses e as deusas para que as favoreceran.
Crían que os deuses e as deusas tiñan aspecto humano.
En Exipto, nos deuses e nas deusas mesturábanse aspectos humanos e animais.
Os deuses e as deusas posuían atributos e poderes diferentes.
As persoas gobernantes eran os únicos que se comunicaban cos deuses e as deusas.
Os sacerdotes e as sacerdotisas celebraban o culto e entregaban ofrendas á divindade.
A relixión serviu como elemento para dominar o pobo.

Audio

Tarefa: que sabes do fenómeno relixioso?

Imaxe caderno

Para comezar, anota no teu caderno todas as palabras que poidas relacionar co fenómeno relixioso, por exemplo, oración ou sacerdote. Logo poñeralas en común cos demais compañeiros e coas demais compañeiras da aula, copiando as palabras que non teñas no teu caderno.