O voso reto como viaxeiros e viaxeiras ao pasado é o seguinte: teredes que aprender todo o que poidades sobre as civilizacións da Antigüidade para volver ao presente e comunicarlle todos eses coñecementos ao resto do alumnado! Para facelo tedes varias opcións: unha presentación, un vídeo ou unha maqueta que represente a cada unha das catro civilizacións.
Difícil? De certo que non é doado, pero podedes conseguilo! A polo reto!
Lectura facilitada
O voso reto
Como viaxeiros e viaxeiras ao pasado, debedes aprender todo sobre as civilizacións da Antigüidade.
Logo, no presente, compartiredes eses coñecementos co resto do alumnado.
Podedes escoller entre:
Facer unha presentación. Crear un vídeo. Construír unha maqueta sobre as catro civilizacións.
Non será fácil, pero podedes conseguilo.
A polo reto!
Audio
Antes de partir, reflexionamos
Antes de comezar calquera viaxe é preciso planificar con coidado que materiais van ser de utilidade, que rutas tomar e onde descansar. Imaxina canto máis importante será cando planeamos unha viaxe no espazo-tempo! Para levar conta de todo o acontecido empregaremos o diario de aprendizaxe, unha especie de caderno de bitácora onde anotaremos o que vaiamos aprendendo, así como o que consideremos oportuno do proceso de ensino-aprendizaxe.
As civilizacións que imos estudar chámanse "civilizacións fluviais" porque xurdiron ao carón de importantes ríos. O primeiro que vas facer é ver un pequeno vídeo sobre a importancia da auga para despois facer unha reflexión individual no diario de aprendizaxe na que recollas o que che pareceu máis importante e se consideras que na actualidade se fai un consumo e tratamento responsable das augas do planeta.
Despois, poñeredes as vosas reflexións en común a través dunha reunión de grupo.
Lectura facilitada
Preparando a viaxe no espazo-tempo
Antes de viaxar, é importante planificar que materiais precisamos,
que rutas seguiremos e onde descansaremos.
Para organizar todo, usaremos o diario de aprendizaxe,
onde anotaremos o que aprendamos e as nosas ideas sobre o proceso.
As civilizacións que estudaremos chámanse civilizacións fluviais
porque naceron preto de grandes ríos.
Primeiro, verás un vídeo sobre a importancia da auga.
Logo, farás unha reflexión no diario de aprendizaxe sobre:
O que che pareceu máis importante.
Se cres que hoxe en día usamos e tratamos a auga de forma responsable.
Por último, compartiredes as vosas reflexións nunha reunión de grupo.
Cuestións para o diario de aprendizaxe:
Que podemos facer hoxe para usar a auga de forma responsable?
Como afecta o cambio climático á dispoñibilidade de auga no mundo?
Que ensinanzas nos deixan as civilizacións antigas sobre o uso responsable da auga?
Que medidas poderiamos empregar na actualidade para facer un uso responsable da auga?
Como cres que afecta o cambio climático á dispoñibilidade da auga no mundo?
Que podemos aprender das civilizacións da antigüidade sobre o uso responsable da auga?
É moi importante que o cubras porque para aprender... hai que reflexionar!
Lembra:
Pregunta ao teu profesor ou profesora se o encherás en papel ou no computador. Se o cubres no computador, non te esquezas de gardalo no teu equipo cando a termines! Ánimo, que o farás xenial!
