O principal río da India é o Ganxes. O nome Ganxes significa "o que vai rápido", ten a súa orixe nos Himalaias e flúe entre a India e Bangladesh. O clima da India, a diferenza con Mesopotamia e con Exipto, non é desértico, polo que a importancia do Ganxes non se debe só ao seu caudal e á achega de auga á agricultura, senón polo enorme significado espiritual e relixioso que ten para as persoas habitantes do país. 

A civilización que xurde na India sobre o 1500 a. C. é a civilización védica. Recibe o seu nome polo conxunto de textos relixiosos denominados "vedas", entre os cales o máis importante é o Rig-veda, composto de xeito oral durante varios séculos.

A diferenza doutras civilizacións, a zona da India estaba ocupada por varios pequenos reinos, pero entre os séculos VI e IV a. C. impúxose o imperio Maurya (322-185 a. C.), que foi o primeiro en unificar o subcontinente e, posteriormente o imperio Gupta. Entre os anos 200 a. C. e o 1200 d. C. prodúcese o período coñecido como "Clásico", onde se sucederon diferentes dinastías gobernantes e no que a India pasou a ser progresivamente un importante centro de comercio con outros reinos, incluídos países de Europa.