Aspectos comúns

Glosario

Estrato social

Definición:: Cada un dos niveis nos que se divide unha sociedade en función da riqueza, poder ou importancia social.
Exemplo:: Ana e Pablo non eran do mesmo estrato social, ela era rica e el tiña que traballar arreo para poder comer.

Privilexiado-Privilexiada

Definición:: Persoa avantaxada que pode facer algo que os demais non poden ou que está libre de obrigas que os demais teñen.
Exemplo:: Sempre fuches unha privilexiada, nunca tiveches que facer as mesmas tarefas ca nós.

Historia de xénero

Definición:: Rama da Historia que trata de ofrecer unha visión máis completa do estudo da humanidade ao incorporar as relacións entre os xéneros e as súas implicacións en política, sociedade e economía. A Historia das Mulleres englóbase dentro deste campo de estudo.
Exemplo:: Grazas aos meus estudos en Historia de Xénero, puiden coñecer a existencia de mulleres medievais moi interesantes.

Excedente

Definición:: Cantidade que sobra, que hai a maiores do que se necesitaba para algo.
Exemplo:: Este ano a colleita de millo foi moi boa, temos suficiente para alimentar as nosas galiñas e podemos vender o que nos sobra para gañar un diñeiro extra.

Sociedade

En xeral, na Antigüidade, existían sociedades moi xerarquizadas onde había estratos sociais ben diferenciados en canto á posesión de riquezas, poder ou influencia e oportunidades.

Sociedades xerarquizadas

A posesión de riqueza

Unha minoría da poboación era a que gozaba de riquezas, propiedades, terras e cargos políticos ou relixiosos importantes, tendo unha situación privilexiada determinada, en moitos casos, polo nacemento ou pola proximidade á familia real.

O poder ou influencia

Pola contra, a maioría da poboación estaba sometida ao poder destes e era a que realizaba os diferentes traballos e servizos.

Ademais, existía un grupo de poboación que carecía de dereitos e sufrían a escravitude, o que implicaba a posesión de persoas e a restrición dos seus dereitos e oportunidades.

Oportunidades: nacer neno ou nena?

Aparte das diferenzas de riqueza e nivel social, nacer neno ou nena tamén determinaba como sería a túa vida. Aplicando os termos que manexamos hoxe, estas sociedades antigas eran en xeral patriarcais, sexistas e machistas.

Patriarcais

Os homes, só polo feito de selo, tiñan unha posición de máis poder que as mulleres, por exemplo, podían acceder aos postos políticos e relixiosos máis importantes.

Sexistas

As tarefas e labores tanto económicas como sociais estaban asociadas a sexos diferentes.

Machistas

As tarefas consideradas máis importantes e mellor pagadas eran en xeral desempeñadas por homes (pensa na cantidade de nomes de reis e faraóns da antigüidade que coñeces) e as consideradas inferiores e peor pagadas eran desempeñadas por mulleres. Aínda así, nas sociedades antigas houbo moitas mulleres que desafiaron os roles de xénero e levaron vidas moi diferentes ás da maioría. Cada vez coñecemos máis exemplos grazas ás investigacións da Historia de Xénero.

Lectura facilitada

As sociedades antigas estaban moi xerarquizadas.
Unhas poucas persoas tiñan riquezas e poder.
A maioría das persoas estaban sometidas e tiñan que realizar traballos.
Existía a escravitude.
As sociedades antigas eran patriarcais, sexistas e machistas.
A Historia de Xénero estuda as mulleres en distintas épocas históricas.

Audio

Economía

A acumulación de excedente, debido a un mellor aproveitamento da auga dos ríos (diques e canles de irrigación) e ao aumento de terra cultivable, fixo que a economía se volvese moito máis complexa. Algunhas características son:

Características da economía

Agricultura

A principal actividade económica segue sendo a agricultura.

Gandería

A gandería ten máis importancia nas rexións áridas.

Artesanía

A artesanía experimenta un gran crecemento en cantidade e variedade, mellorando os acabados.

Moeda e troco

Non se emprega a moeda como a entendemos hoxe, pero si empregan o valor de metais preciosos como referencia.
Practícase o troco.

Comercio

A actividade comercial aumenta notablemente.

Impostos

Os centros de poder político e/ou relixioso recadan impostos.

Lectura facilitada

A economía das sociedades antigas medrou debido a un mellor aproveitamento da auga dos ríos.
A principal actividade económica é a agricultura.
A gandaría ten máis importancia nas rexións áridas.
A artesanía experimenta un gran crecemento.
Non se empregan moedas como agora, pero teñen como referencia o valor de metais preciosos.
Practícase o troco.
Aumenta o comercio.
Os centros de poder político e/ou relixioso recadan impostos.

Audio

Tarefa

Pictograma exame Agora teredes que sintetizar nunhas poucas palabras, as características básicas das culturas antigas e para iso teredes que completar no cadro da mesma ficha que xa descargastes, os recadros de "sociedade antiga" e "economía antiga".

Pouco a pouco o voso informe está collendo forma, ánimo e seguide así!

Licenciado baixo a Licenza Creative Commons Atribución Non-comercial Compartir igual 4.0