A presentación

Como facela?

Facer unha presentación de diapositivas pode parecer complicado, pero sempre podemos contar con titoriais que nos amosan que é algo sinxelo. Neste caso, verás un titorial que axudará o teu grupo a elaborala usando a ferramenta de LibreOffice Impress.

O

Que debes incluír nela?

Na presentación usaredes imaxes relacionadas e información co aspecto ou parte da civilización fluvial que vos tocou; por exemplo, se falades da sociedade do antigo Exipto, podedes incluír unha imaxe dunha pirámide de poboación.

Resumindo:

1. No voso grupo tendes 6 aspectos ou partes a desenvolver. No caso de que sexades máis ou menos membros nun grupo, dividiredes o traballo.
2. Cada membro do grupo traballará na parte que lle tocou, é dicir, a presentación abarcará as 6 partes relacionadas coa civilización fluvial que vos tocou.
3. A presentación debe ter as seguintes características:
   1. Un título, por exemplo, "O Antigo Exipto", acompañado dunha imaxe.
   2. Un índice, que indique as partes que ides explicar. 
   3. Texto e imaxes que amosen información da civilización que está a traballar o voso grupo.
   4. Todas as imaxes levarán un texto explicativo, por exemplo, se incluídes unha pirámide de poboación, na base da imaxe indicaredes o que é e anotaredes a información relevante de cada grupo social representado na mesma. 
   5. Non se debe incluír moito texto e debe ser claro. Non poñer máis de 4 liñas.
   6. O tipo de letra usado na presentación deberase escoller entre Arial, Times New Roman ou Verdana. 
   7. O tamaño da letra será de 18 para o título, 16 para o encabezamento e 12 para o corpo do texto.
   8. Non se deben usar cores moi rechamantes para o texto.
   9. Pódense incluír vídeos e ligazóns a páxinas relacionadas coa civilización que poidan ser de interese.
   10. Na última diapositiva incluirase a webgrafía e bibliografía usada na presentación.

 A maqueta

Que temos que facer?

Unha maqueta pode ser unha reconstrución dun elemento real (templo, escultura) ou pode servir como material explicativo (un mapa en 3D ou unha pirámide de poboación).

Como podemos facela?

Unha vez escollido o elemento ou material que queredes representar na maqueta, debedes seguir estes pasos:

1. Investigar. Tedes que informarvos ben do que queredes representar (fotos, debuxos, vídeos, exemplos de maquetas que poidan existir).
2. Debuxar. Debedes facer un bosquexo ou plano do que queredes representar.
3. Materiais. Tedes que facer unha lista dos materiais que necesitades para a construción, como e quen os pode conseguir. Recordade reutilizar obxectos e empregar material de refugallo.
4. Explicación. A maqueta non pode ser só unha representación, debe levar unha pequena cartela explicativa do que representa e da súa relevancia.

Deixade voar a vosa creatividade. Aquí tendes algúns exemplos para coller ideas:

O vídeo.

A proposta

O tema do vídeo será unha entrevista a unha ou un personaxe importante da civilización asignada ao teu equipo. Por exemplo:

• Antigo Exipto: Cleopatra.
• Mesopotamia: Enheduanna.
• India: Brahman.
• China: Lao Tsé.

Para gravar o vídeo pode usarse:

• Unha cámara de vídeo.
• Un móbil.

Pasos a seguir

Antes de gravar o vídeo:

• Os membros do equipo escollerán a persoa/personaxe a quen se lle vai facer a entrevista.
• O equipo elaborará cuestións e as súas correspondentes respostas sobre a sociedade, política, economía, arte, cultura e relixión da civilización asignada. 
• Escollerase  un membro de equipo que fará do ou da personaxe a entrevistar e a outros dous que fagan de entrevistadores.
• Deseñarase un vestiario acorde coa civilización asignada e, incluso, debuxar un escenario con elementos da civilización correspondente.
• Unha vez que teñades o guión coas preguntas e as respostas, prepararedes a gravación da entrevista.