As principais culturas chinesas da Idade Antiga desenvolvéronse nas beiras de dous grandes ríos: o Amarelo e o Iangtsé. Igual que noutras civilizacións antigas, tiña unha gran importancia a relixión. Mais, a diferenza doutras occidentais, na cultura chinesa dábase máis relevancia á natureza.

As manifestacións artísticas como a cerámica, a porcelana, a seda ou a caligrafía tiñan a mesma relevancia que a arquitectura, a escultura ou a pintura. Na dinastía Shang realizáronse grandes recipientes de bronce para rituais funerarios. Os máis característicos son decorados co motivo taotie, unha especie de máscara animal.

Na dinastía Qin destacan as estatuas dos guerreiros de Xi’an: máis de 8000 esculturas de soldados de terracota que formaban parte da tumba do primeiro emperador de China.