A dureza é unha das propiedades máis útiles para identificar minerais.

Nesta actividade imos probar e comparar distintos minerais para saber cales son máis brandos e cales máis duros. Para facelo correctamente, segue os pasos que se indican a continuación:

1. Prepara os materiais: reúne os minerais que vas probar (exemplo: talco, fluorita, cuarzo) e asegúrate de que cada un está ben identificado.
2. Proba a dureza: intenta riscar un mineral cun outro. Se o primeiro mineral risca ao segundo, significa que ten maior dureza. Repíteo con todos os minerais.
3. Clasifica os minerais: ordena os minerais de menor a maior dureza, baseándote nas probas realizadas. Utiliza a escala de Mohs para situar cada mineral (por exemplo, o talco ten dureza 1 e o diamante 10).
4. Comproba a orde: revisa que a orde sexa correcta, comparando os resultados das probas coas propiedades coñecidas de cada mineral.
5. Anota os resultados: fai unha lista dos minerais ordenados pola súa dureza e escribe as observacións realizadas durante as probas.
6. Conclusión: analiza as características dos minerais e as propiedades observadas nas probas.

Precaucións
Manipula con coidado os minerais, especialmente os de maior dureza.
Realiza as probas suavemente para non danar os materiais.

Imos descubrir se o fragmento que tes diante é ouro verdadeiro ou pola contra se te poderían estafar!

Para isto, segue os seguintes pasos:

1. Recolle o material necesario

• Unha báscula precisa para medir o peso do fragmento.
• Un recipiente graduado (como unha probeta) con auga.
• Unha ferramenta para somerxer o fragmento sen tocar o recipiente (como un fío delgado ou unha pinza).

2. Mide a masa do fragmento

Coloca o fragmento na báscula e anota o seu peso en gramos (g).

3. Enche o recipiente con auga

Enche a probeta con suficiente auga para cubrir a peza e anota o volume inicial da auga (en mililitros ou cm³).

4. Somerxe o fragmento

Con coidado, introduce o fragmento no recipiente coa auga sen derramar nada.
Asegúrate de que o fragmento quede completamente somerxido e que non toque as paredes ou o fondo do recipiente.

5. Anota o volume final da auga

Observa o nivel da auga despois de introducir o fragmento e anota o novo volume.

6. Calcula o volume do fragmento

Resta o volume inicial ao volume final.

• Volume do fragmento = Volume final − Volume inicial

7. Determina a densidade

Usa a fórmula da densidade:

• Densidade = Masa / Volume

8. Compara os valores da densidade

• A densidade do ouro puro é aproximadamente 19,3 g/cm³
• A densidade da pirita é moito menor, aproximadamente 5 g/cm³

Se o valor se aproxima a 19,3 g/cm³, probablemente o fragmento sexa ouro. Se é máis próximo a 5 g/cm³, é pirita.

Se tes dúbidas, repite o procedemento para asegurarte da precisión dos valores.