1. Primeiros pasos

Glosario

Fenómeno xeolóxico

Ascenso magmático que dá lugar a formación dun volcán

Definición:: Proceso natural que ocorre na Terra como resultado da súa dinámica interna ou externa, e que pode causar cambios importantes na superficie e no interior terrestre.
Exemplo:: Os volcáns, os sismos ou a modelaxe do relevo son fenómenos xeolóxicos importantes.

Mapa xeolóxico

Definición:: Mapa que mostra as diferentes rochas, a súa idade e as estruturas dun territorio, usando cores ou símbolos distintos para representalas.
Exemplo:: O mapa xeolóxico da Península Ibérica mostra que está formada por rochas moi diferentes.

ODS 2030

Definición:: Os 17 Obxectivos de Desenvolvemento Sostible (ODS 2030) constitúen un chamamento universal á acción para poñer fin á pobreza, protexer o planeta e mellorar as vidas e as perspectivas das persoas en todo o mundo.
Exemplo:: O obxectivo número 1 dos ODS 2030 é poñer fin á pobreza en todas as súas formas en todo o mundo.

Xeosfera

Pictograma da xeosfera

Definición:: Parte sólida da Terra constituída por diversas capas concéntricas, desde a superficie ata o interior terrestre.
Exemplo:: A xeosfera ten un radio aproximado duns 6400 km.

Exploremos a xeosfera!

Sabías que baixo os teus pés hai pistas que contan a historia da Terra? A través das rochas e minerais podemos descubrir como é o interior do planeta e como foi cambiando co paso do tempo.

As rochas e os minerais non só forman a paisaxe, senón que tamén son esenciais para a nosa vida diaria: están nos edificios, nos móbiles, nos lapis, nos vidros e mesmo nalgúns alimentos.

Observa o mapa xeolóxico de Galicia.

Podes situar a túa vila ou cidade? Se tes dificultades para facelo, premer na icona inferior de "Apoio visual" pode ser de axuda.
Que tipo de rochas hai debaixo do chan que pisas cada día?

Aínda que agora o mapa poida parecer complicado, ao rematar saberás recoñecer moitas desas rochas e comprenderás mellor as paisaxes de Galicia. Quizais mesmo che apeteza viaxar pola nosa comunidade para descubrir diferentes zonas xeolóxicas!

Neste recurso aprenderás a interpretar mapas e planos e a recoñecer os minerais e rochas que hai na túa contorna. O teu reto será converterte nunha persoa exploradora da xeosfera e descubrir os tesouros xeolóxicos que se agochan baixo os teus pés.

Comezamos a explorar?

Lectura facilitada

Sabías que baixo os teus pés hai pistas que contan a historia da Terra?

Coas rochas e os minerais podemos descubrir
como é o interior do planeta
e como foi cambiando co tempo.

As rochas e minerais non só forman a paisaxe.
Tamén son moi importantes para a nosa vida diaria.
Están nos edificios, nos móbiles, nos lapis, no vidro
e mesmo nalgúns alimentos.

Agora imos observar o mapa xeolóxico de Galicia.

Podes atopar onde está a túa vila ou cidade?
Se che custa, preme na icona de “Apoio visual”.
Que tipo de rochas hai debaixo do chan que pisas cada día?

Aínda que agora o mapa poida parecer difícil,
cando remates este tema saberás recoñecer moitas rochas
e entenderás mellor as paisaxes de Galicia.

Quizais ata che entren ganas de viaxar pola comunidade
para descubrir zonas xeolóxicas diferentes.

----

Neste recurso vas aprender a interpretar mapas e planos
e recoñecer que minerais e rochas hai na túa contorna.

O teu reto será converterte nunha persoa exploradora da xeosfera
e descubrir os tesouros que se agochan baixo os teus pés.

Comezamos a explorar?

Audio

Apoio visual

Premendo na ligazón inferior podedes ver o mapa con maior detalle.

Mapa político de Galicia: concellos e comarcas.

Comarcas e concellos de Galicia (Nova xanela)

Que vas aprender?

Ao longo deste recurso aprenderás a:

Identificar a estrutura interna da Terra e as súas diferentes capas.
Analizar os procesos internos da Terra e o seu papel na formación dos materiais da superficie terrestre.
Entender os fenómenos xeolóxicos como terremotos, erupcións volcánicas e a formación de cadeas montañosas.
Comprender a composición, características e clasificación das rochas e dos minerais.
Coñecer a importancia das rochas e minerais na conformación da xeosfera.
Participar na consecución dos obxectivos de desenvolvemento sostible (ODS 2030), especialmente co ODS 7 (enerxía accesible e non contaminante) e co ODS 12 (produción e consumo responsables).

Lectura facilitada

Que vas aprender?

Como é o interior da Terra e cales son as súas capas.
Que son os volcáns, os terremotos e as montañas.
Como se forman as rochas e os minerais.
Para que se usan as rochas e minerais e por que son tan importantes.
Colaborar cos Obxectivos de Desenvolvemento Sostible (ODS 2030), especialmente:
- ODS 7: usar enerxía barata e non contaminante,
- ODS 12: producir e consumir sen danar a natureza.

Licenciado baixo a Licenza Creative Commons Atribución Non-comercial Compartir igual 4.0