Definición:
Zona onde as rochas quedan á vista na superficie, sen ter que escavar para velas.
Exemplo:
Nun camiño do monte puidemos ver un afloramento de granito.
Definición:
Técnica que consiste en perforar o terreo para extraer mostras do seu interior.
Exemplo:
Esas científicas fixeron unha sondaxe para estudar as rochas que están a varios metros de profundidade.
A Terra non sempre foi como a coñecemos. Hai máis de 4.500 millóns de anos, era unha masa de material fundido que, ao arrefriarse, deu lugar á xeosfera, a parte sólida do noso planeta.
No seguinte vídeo podes ver unha representación da formación do noso planeta entre os minutos 1:27 e 7:12.
Co paso do tempo, a partir dese material fundido, os compoñentes máis densos afundíronse e deron lugar ao núcleo, mentres que os máis lixeiros ascenderon e formaron a codia.
Deste modo, organizáronse as capas da Terra: codia, manto (superior e inferior) e núcleo (externo e interno).
Pero... como chegamos a coñecer a estrutura interna da Terra?
Métodos de estudo do interior terrestre
Analizando as rochas da superficie ou de zonas de moi pouca profundidade, materiais expulsados polos volcáns, mostras extraídas en minas e sondaxes ou mesmo en afloramentos superficiais.
Mediante o método sísmico, observamos como se propagan as ondas sísmicas nos terremotos, o que nos axuda a deducir a composición e estrutura das capas internas.
Tamén hai outros, como o magnético, ou o gravimétrico, que miden variacións no campo magnético terrestre ou o valor da gravidade.
Incluso estudando a composición dos meteoritos que chegan á superficie terrestre chegamos a coñecer a composición do seu interior.
A Terra non sempre foi como é agora.
Hai máis de 4.500 millóns de anos, era unha masa de material moi quente e fundido.
Co paso do tempo, ese material arrefriouse.
Así se formou a xeosfera, a parte sólida do noso planeta.
No seguinte vídeo podes ver unha representación da formación da Terra.
Podes vela entre os minutos 1:27 e 7:12.
Co paso do tempo, ese material fundido separouse.
As partes máis densas afundíronse e formaron o núcleo.
As partes máis lixeiras subiron e formaron a codia.
Así se formaron as capas da Terra:
Pero... como sabemos como é o interior da Terra?
Usamos métodos de estudo que nos axudan a coñecer o que hai baixo a superficie.
Métodos directos
Analizamos as rochas da superficie ou de zonas pouco profundas.
Tamén estudamos materiais que saen dos volcáns,
as mostras que se extraen en minas e sondaxes,
e os afloramentos que aparecen á vista na superficie.
Métodos indirectos
Co método sísmico observamos como se moven as ondas dos terremotos.
Isto axúdanos a saber como son e de que están feitas as capas internas da Terra.
Tamén usamos outros métodos, como:
– o método magnético, que mide cambios no campo magnético da Terra,
– e o método gravimétrico, que mide cambios na gravidade.
Ademais, estudamos os meteoritos que chegan á Terra. A súa composición axúdanos a entender como é o interior do noso planeta.
Canto credes que foi a máxima profundidade explorada polo ser humano na superficie terrestre?
Cada grupo buscará información en Internet sobre un lugar profundo do planeta (como a Fosa das Sandwich do Sur, a fosa de Porto Rico, a fosa das Filipinas ou a Fosa de Tonga). Recorda que as fontes deben ser fiables.
En cada grupo, lede a información e preparade unha ficha sinxela que inclúa:
A persoa portavoz de cada grupo deberá compartir a información co resto da clase.
Aquí tes un exemplo de ficha.
| Nome do lugar | Fosa das Marianas (abismo Challenger). |
|---|---|
| Profundidade aproximada | Uns 11.000 m (11 km). |
| Localización | Océano Pacífico occidental, preto das Illas Marianas. |
| Dato curioso ou interesante | É o punto máis profundo coñecido da Terra. No ano 1960, dous exploradores, Jaques Piccard e Don Walsh, chegaron ao fondo a bordo do batiscafo Trieste, e en 2012 o cineasta James Cameron repetiu a fazaña cunha inmersión en solitario. |
Licenciado baixo a Licenza Creative Commons Atribución Non-comercial Compartir igual 4.0