A explotación de minerais e rochas en Galicia
Os minerais e rochas non só modelan a paisaxe da Terra, senón que tamén son recursos esenciais para a vida humana. A súa extracción e uso teñen unha grande importancia económica e tecnolóxica, pero tamén xeran impactos ambientais que cómpre xestionar de forma sostible.
Principais formas de explotación
Para obter minerais e rochas, empréganse diferentes métodos de extracción:
- Canteiras ou pedreiras: extracción superficial de rochas como o granito e a lousa, usadas na construción. Exemplo: as canteiras de O Porriño para o granito e as de Valdeorras para a lousa.
- Minas a ceo aberto: escavacións de grandes dimensións para extraer minerais valiosos. Exemplo: explotacións de cuarzo entre Vedra e Boqueixón.
- Minas subterráneas: pozos e galerías baixo terra para extraer minerais en profundidade, como a magnesita en O Incio.
- Perforacións: usadas para extraer petróleo, gas ou auga subterránea.
Explotacións mineiras en Galicia
En Galicia existen unha gran cantidade de explotacións mineiras, que supoñen unha porcentaxe importante sobre o total de España. Algúns exemplos son:
-
- Áridos no Condado-A Paradanta, nas terrazas fluviais do río Miño.
- Arxilas en Mesía.
- Granito: hai explotacións nas catro provincias, cun importante número de variedades, como pode ser o granito silvestre de Parga (Guitiriz).
- Lousa: Galicia é un importante exportador a nivel mundial desta rocha. Ademais de na comarca de Valdeorras, é importante a produción de lousa verde en Pol.
- Calcopirita en Touro.
- Coltán (columbita – tantalita) en A Penouta, Viana do Bolo.
- Ouro en Corcoesto e Salvaterra do Miño.
- Estaño en A Penouta, Viana do Bolo.
- Wolframio: Casaio (Carballeda de Valdeorras), San Finx (Lousame) ou Varilongo (Santa Comba).
- Caolín: hai explotacións activas na Mariña lucense e Vimianzo.
- Feldespatos: a maioría están na provincia de Lugo.
- Magnesita: en O Incio, ao sur da provincia de Lugo.
- Minerais de litio: en Doade (Beariz) e concellos limítrofes.
- Carbón: existiron explotacións de lignito empregados para a produción de electricidade en Meirama e As Pontes.
Impactos da extracción
A explotación de minerais e rochas pode provocar:
- Destrución da paisaxe, como se observa nas antigas explotacións de Monte Neme ou Touro.
- Contaminación do aire e da auga debido aos residuos mineiros e o po en suspensión.
- Redución da biodiversidade, xa que moitos ecosistemas son destruídos pola actividade mineira.
- Riscos para a saúde, pola exposición a substancias tóxicas e metais pesados.
Cara a unha extracción sostible
Para reducir o impacto da minería e a extracción de rochas, é fundamental apostar por un modelo máis sostible:
- Restaurar as zonas explotadas, devolvéndolles a súa función ecolóxica.
- Reciclar e reutilizar materiais, como metais de dispositivos electrónicos.
- Reducir o consumo de minerais escasos, optando por alternativas máis respectuosas co ambiente.
- A explotación mineira debe facerse con responsabilidade para garantir que as xeracións futuras tamén poidan aproveitar os recursos xeolóxicos sen esgotalos nin destruír o medio.
Lectura facilitada
Os minerais e as rochas non só dan forma á paisaxe da Terra,
senón que tamén son moi importantes para a vida humana.
Serven para facer casas, estradas, móbiles, ordenadores e moito máis.
A súa extracción ten moito valor económico e tecnolóxico,
pero tamén pode danar o medio ambiente
se non se fai dun xeito sostible.
Principais formas de explotación
Para extraer minerais e rochas da Terra, úsanse varios métodos:
- Canteiras ou pedreiras: extracción desde a superficie.
Úsanse para sacar granito ou lousa para construción.
Exemplo: O Porriño (granito) e Valdeorras (lousa). - Minas a ceo aberto: escavacións moi grandes.
Úsanse para sacar minerais como o cuarzo.
Exemplo: Vedra e Boqueixón. - Minas subterráneas: fanse túneles baixo terra
para sacar minerais en profundidade.
Exemplo: magnesita en O Incio. - Perforacións: úsanse para sacar petróleo, gas ou auga do subsolo.
Explotacións mineiras en Galicia
En Galicia hai moitas minas,
e representan unha parte importante das explotacións de toda España.
Algúns exemplos son:
- Áridos no Condado-A Paradanta (río Miño).
- Arxilas en Mesía.
- Granito en moitas zonas, como o granito silvestre de Parga (Guitiriz).
- Lousa: Galicia exporta moita lousa ao mundo, sobre todo en Valdeorras e en Pol.
- Calcopirita en Touro.
- Coltán en A Penouta (Viana do Bolo).
- Ouro en Corcoesto e Salvaterra do Miño.
- Estaño en A Penouta.
- Wolframio en Casaio, San Finx e Varilongo.
- Caolín na Mariña lucense e en Vimianzo.
- Feldespatos sobre todo na provincia de Lugo.
- Magnesita en O Incio (Lugo).
- Litio en Doade (Beariz) e arredores.
- Carbón en antigas minas de Meirama e As Pontes,
que se usaban para facer electricidade.
Impactos da extracción
A extracción de minerais e rochas pode causar problemas no medio ambiente, como:
- Destrución da paisaxe, é dicir, cambia ou rompe o aspecto natural dos lugares.
Isto pasou, por exemplo, en Monte Neme e Touro. - Contaminación do aire e da auga, porque se soltan restos e po no entorno.
- Menos plantas e animais, porque moitos desaparecen cando se escava a terra.
- Perigos para a saúde, xa que hai sustancias tóxicas que poden afectar ás persoas.
Cara a unha extracción sostible
Para coidar a natureza e seguir aproveitando os minerais,
é importante facer a extracción dunha maneira máis responsable:
- Reparar os lugares explotados, plantando árbores ou limpando a zona.
- Reutilizar e reciclar materiais, como os metais dos móbiles ou ordenadores vellos.
- Usar menos minerais raros, buscando outras opcións máis ecolóxicas.
- Facer uso da minería pensando no futuro,
para que as próximas xeracións tamén poidan usar estes recursos
sen destruír o planeta.
