Poñer en valor o patrimonio local
Agora chega a fase final: toca difundir o voso traballo, compartir a vosa investigación e poñer en valor todo o aprendido sobre o patrimonio xeolóxico local.
Así axudaredes a que máis persoas coñezan, respecten e aprecien a riqueza xeolóxica da vosa contorna.
Podedes escoller algunha das seguintes posibilidades:
Opción A
Publicar o mapa do voso xeoparque
Podedes expoñer o mapa cos puntos de interese xeolóxico nos corredores do centro ou nun taboleiro informativo.
Ademais, sería posible divulgar o voso traballo a través da páxina web do centro educativo, para que toda a comunidade escolar poida consultar o voso xeoparque local.
Opción B
Presentar unha charla divulgativa
Outra opción é organizar unha pequena charla ou exposición para a comunidade educativa, onde expliquedes como foi o proceso de investigación, que lugares seleccionastes e por que, e cales foron as curiosidades máis destacadas que descubristes sobre a xeoloxía do voso territorio.
Opción C
Crear unha ruta xeolóxica guiada
Por último, podedes deseñar unha ruta a pé polos principais puntos do voso xeoparque local, guiando a outros compañeiros e compañeiras, familias ou persoas interesadas, para explicarlles en directo a importancia dos lugares escollidos, ademais de compartir anécdotas ou descubrimentos feitos durante a investigación.
Isto xa sería de profesionais da xeoloxía!
Lectura facilitada
Agora chega a fase final:
toca compartir o voso traballo
e amosar todo o que aprendestes sobre a xeoloxía da vosa zona.
Así, outras persoas poderán coñecer, respectar e valorar
a riqueza xeolóxica da contorna.
Podedes escoller unha destas opcións:
Opción A
Publicar o mapa do voso xeoparque
Podedes expor o mapa cos puntos xeolóxicos
nos corredores do centro ou nun taboleiro informativo.
Tamén o podedes compartir na páxina web do centro educativo,
para que toda a comunidade escolar o poida ver.
Opción B
Presentar unha charla divulgativa
Outra idea é facer unha charla ou exposición
para contar o voso traballo.
Podedes explicar:
- Como fixestes a investigación.
- Que lugares escollestes e por que.
- Que curiosidades descubristes sobre a xeoloxía da zona.
Opción C
Crear unha ruta xeolóxica guiada
Tamén podedes organizar unha ruta a pé
polos principais puntos do voso xeoparque.
Guiaredes a outros compañeiros e compañeiras, familias ou persoas interesadas,
e explicaredes en directo a importancia de cada lugar.
Tamén podedes contar anécdotas e descubrimentos
feitos durante o proxecto.
Isto xa sería de profesionais da xeoloxía!