2.3.12 Os materiais.

Arredor de nós podemos observar unha gran cantidade de produtos creados polo ser humano para satisfacer as súas necesidades ou para mellorar a súa calidade de vida.
Na súa fabricación utilízase unha grande variedade de materias primas e materiais que lle outorgan a cada produto unhas características singulares.

Materias primas, materiais e produtos

• Materias primas: son as substancias que se extraen directamente da natureza. Xa que logo, existen varios tipos de materias primas dependendo da súa procedencia:
  • Materias primas animais: la, seda, peles...
  • Materias primas vexetais: madeira, codia, algodón, liño, esparto...
  • Materias primas minerais: arxila, area, mármore...
• Materiais elaborados: son as materias preparadas e dispoñibles para elaborar directamente calquera produto a partir delas. Obtéñense mediante a transformación fisicoquímica das materias primas. Os materiais non están dispoñibles na natureza tal e como os coñecemos, senón que antes de os usar sufriron unha transformación.
• Produtos: son os obxectos, utensilios, etc., creados polo ser humano para poder satisfacer as súas necesidades e mellorar a súa calidade de vida.

 Materiais naturais e artificiais

Os obxectos están fabricados por unha gran variedade de materiais que se poden clasificar segundo diferentes criterios como, por exemplo, a súa orixe, propiedades, etc. Segundo a súa orixe podemos clasificar os materiais en:

• Naturais: son os que se achan na natureza, como o algodón, a madeira, as rochas, etc.

Exemplos de materiais naturais

• Sintéticos: son os creados polo ser humano a partir dos materiais naturais, como o formigón, o vidro, o papel, os plásticos, etc.

Exemplos de materiais sintéticos