2.2.1 - Clima de Galicia

O tempo en Galicia é, en xeral, húmido e de temperaturas suaves, o que corresponde a un clima de transición entre o clima oceánico e o mediterráneo.

Case todo o litoral ten características propias do clima oceánico. Gran parte do interior ten características propias do clima oceánico-continental. A Galicia do sur e sueste tenas de clima mediterráneo.

Tamén hai factores xeográficos que orixinan certa diversidade climática. A disposición do relevo inflúe na distribución das precipitacións, pois os ventos húmidos do suroeste -vento mareiro- , procedentes do Atlántico, ao chocaren contra a Dorsal Galega, descargan a maior parte da humidade en forma de chuvia. No seu camiño cara ao leste xa non volven achar outro obstáculo montañoso importante ata as serras Surorientais, onde descargan o resto da humidade. A zona comprendida entre ambos os dous sistemas montañosos recibe menos precipitacións: é a máis seca do país. Estes ventos do suroeste sopran preferentemente de outono a abril, a época máis chuviosa do ano.

Na franxa cantábrica costeira predominan no verán os ventos do noroeste e producen abundante nubosidade de estancamento. Na penechaira Galega sopran a miúdo no inverno os ventos fríos do nordeste, que varren as nubes.

A corrente do Golfo, que baña as costas galaicas, acrecenta a humidade e dulcifica as temperaturas; inflúe menos no interior.

Galicia, pola situación xeográfica na zona temperada, ten clima de tipo oceánico en xeral. Non obstante, cerca da costa, as temperaturas son suaves e as precipitacións oscilan entre os 1.500 mm e os 2.000 mm. No interior, as temperaturas son máis extremas e as precipitacións non chegan aos 1.000 milímetros.

 

Perfil de Galicia, de oeste a leste. Zonas de precipitacións máximas e mínimas.

 

 O anticiclón das illas Azores

O anticiclón dos Azores inflúe moito nos cambios de tempo en Galicia. No verán sitúase ao norte e impide a penetración das borrascas atlánticas da fronte polar, que raras veces nos afectan. No inverno, o anticiclón desprázase máis ao sur, deixa penetrar as borrascas e hai abundantes precipitacións. A variación climática prodúcese cando:

• A fronte polar está ao sur: é inverno, tempo húmido.
• A fronte polar está ao norte: é verán, tempo seco.

En Galicia, no verán, domina a situación anticiclónica, con ceos despexados. No inverno domina a situación ciclónica ou borrasca, con nubes e chuvias. En Galicia, verán e inverno están ben definidos e contrastados. Non ocorre así na primavera o outono, moi inestables normalmente.

 

 

Gradación climática

En Galicia hai gradación climática desde a zona occidental á oriental. Os valores da amplitude térmica van aumentando ao afastarse da costa, así como o número de meses con déficit de precipitacións. Os cultivos axéitanse ás condicións climáticas.

 

Amplitude térmica anual en Galicia (º C): é a diferenza entre as temperaturas medias do mes máis quente e as do mes máis frío.

 

Déficit de precipitacións

En Galicia as precipitacións superan, na maior parte do ano, a perda de auga dos solos por transpiración das plantas e por evaporación. Con todo, nalgunhas zonas, de veráns longos e calorosos, a evaporación supera as precipitacións. Nos vales do Miño e do Sil, por exemplo, hai déficit de auga durante cinco meses.

En Galicia chove moito, non obstante, compren obras de rega para algunhas comarcas, pois o solo non retén no verán a cantidade de auga necesaria para as plantas.

 

 

Déficit de precipitación anual en Galicia. Número de meses con déficit de precipitación

 

Climogramas de Galicia

 

Xunqueira–Viveiro	Serra do Invernadoiro

 

 

O Xipro (Ancares)	Mabegondo–A Coruña

 

 

 

Lourizán–Pontevedra	Monte Aloia-Tui

 

Microclimas

Algunhas comarcas de Galicia teñen factores climáticos específicos, diferentes do clima xeral da zona circundante: microclima.

Os microclimas de Galicia permiten cultivos propios de clima mediterráneo ou subtropical, como as laranxeiras e as oliveiras.

Consecuencias do clima en Galicia

• En Galicia os solos reciben abundantes chuvias invernais, pero no verán padecen a seca, pola evaporación e a permeabilidade das terras.
• O ríos levan moita auga durante case todo o ano.
• O clima favorece a vexetación abundante, de árbores caducifolias principalmente.
• O clima inflúe no asentamento e distribución da poboación.
• A diversidade climática determina variedade de construcións.
• Os veráns adoitan ser longos e relativamente calorosos, favorecen os incendios forestais.

Meteogalicia

É un organismo encargado de predicir o tempo en Galicia. Ten sede en Santiago de Compostela e válese dos datos meteorolóxicos –precipitacións, temperatura, forza e dirección do vento, e presión atmosférica– obtidos nas estacións meteorolóxicas de Galicia.

Unhas estacións son automáticas recollen datos que se envían a Meteogalicia. Noutras estacións os datos obtéñense manualmente. Así mesmo, hai globos sonda de helio que ascenden ata os 25 km e transmiten datos recollidos a distintas alturas.

 A información é procesada nos computadores do Centro de Supercomputación de Galicia. Os meteorólogos, tras comprobacións e análises, emiten os prognósticos do tempo.

 

Rede de estacións meteorolóxicas de Galicia.