A tradición oral galega está chea de contos e lendas fascinantes que foron pasando de xeración en xeración. Agora, é a vosa quenda de darlles vida dun xeito diferente e actual: transformándoas nun cómic!

Antes de comezar a vosa creación, aprenderedes sobre a linguaxe audiovisual, explorando como se contan historias a través do cómic, da fotografía, do cine e da animación. Descubriredes como se constrúe unha viñeta, como se xera a sensación de movemento ou emocións nunha imaxe, e como se organizan os planos e os encadres para contar mellor unha historia.

A través de diferentes actividades, practicaredes estas técnicas e analizaredes exemplos que vos axuden a comprender mellor a linguaxe audiovisual.

Cando esteades preparados e preparadas, asumiredes o reto final: crear o voso propio cómic baseado nunha lenda ou conto popular galego. Será unha maneira creativa e persoal de manter viva a nosa cultura, utilizando as ferramentas do mundo da imaxe e da narrativa gráfica.

Estades preparados para ser os gardiáns e gardiás da nosa historia?