Como xa sabes, as provincias agrúpanse en comunidades autónomas.  A Comunidade Autónoma de Galicia conta con catro provincias: A Coruña, Lugo, Ourense e Pontevedra.

En 1981 aprobouse o Estatuto de Autonomía de Galicia. O Estatuto de Galicia é a lei máis importante da nosa comunidade autónoma e establece como se organiza Galicia e como se reparten os poderes públicos, é dicir, quen goberna, quen propón novas leis e quen as aproba e quen reparte xustiza. 

Hai tres poderes principais: o poder lexislativo, o poder executivo e o poder xudicial.

En Galicia o poder lexislativo está en mans do parlamento autonómico. Está formado por deputados e deputadas elixidos nas eleccións autonómicas, que se celebran cada catro anos. Entre as principais funcións do Parlamento están as de aprobar leis, controlar a acción do goberno, aprobar o orzamento de gastos ou elixir ao presidente da Xunta.

O poder executivo é o goberno autonómico. Na nosa comunidade autónoma chámase Xunta de Galicia. Esta institución dirixe a política de Galicia e está formada polo presidente ou presidenta e as conselleiras e conselleiros. As Consellerías ocúpanse de diferentes ámbitos e son as seguintes:

• Presidencia, Xustiza e Deportes
• Cultura, Lingua e Xuventude
• Economía e Industria
• Educación, Ciencia, Universidades e Formación Profesional
• Emprego, Comercio e Emigración
• Facenda e Administración Pública
• Mar
• Medio Ambiente e Cambio Climático
• Medio Rural
• Política Social e Igualdade
• Sanidade
• Vivenda e Planificación de Infraestruturas

O poder xudicial está en mans do Tribunal de Xustiza de Galicia. Está formado por unha ou un presidente, as presidentas ou presidentes de sala e as maxistradas ou maxistrados de cada sala. Entre as súas funcións destacan as de garantir o cumprimento da lei, protexer os dereitos das galegas e galegos, favorecer a convivencia pacífica ou contribuír á paz social.