España está situada na Península Ibérica ao sur de Europa. Limita ao norte con Andorra e Francia e ao oeste con Portugal.

Tamén ten dous arquipélagos: as Illas Baleares que están situadas no Mar Mediterráneo e as Illas Canarias, que se atopan no Océano Atlántico.

Ao norte de España atopamos o Mar Cantábrico, ao leste e ao sur da península o Mar Mediterráneo e ao oeste e ao sur, o Océano Atlántico.

España está dividida en 17 comunidades autónomas. Ademais ten 2 cidades autónomas, Ceuta e Melilla, que se atopan no norte de África.

As comunidades autónomas están divididas á súa vez en territorios máis pequenos chamados provincias. Algunhas comunidades autónomas teñen varias provincias, como por exemplo Andalucía ou Galicia, en cambio outras só teñen unha provincia, como Cantabria ou A Rioxa. Cada provincia está formada por un conxunto de municipios.

Cada comunidade autónoma ten unha capital e unha bandeira que a representan. Tamén ten un himno que se toca en acontecementos importantes. Algunhas comunidades autónomas teñen unha lingua propia que convive co castelán e que se fala nas administracións públicas e se ensina nas escolas. O catalán en Cataluña, a Comunidade Valenciana e as Illas Baleares. O éuscaro no País Vasco e o galego en Galicia.