2.4 Propiedades xerais da enerxía

Todas as formas da enerxía teñen unhas propiedades comúns, que detallamos nos puntos seguintes.

A enerxía pódese almacenar

• O combustible que temos no depósito do coche ten enerxía química almacenada, e así seguirá ata que non o queimemos.
• A batería dese mesmo coche ten enerxía eléctrica acumulada na espera de ser utilizada cando poñamos en marcha o motor.
• A auga embalsada nun encoro ten enerxía potencial gravitacional almacenada, que non se usará ata que a auga caia e mova as turbinas.

Daquela, a enerxía pódese gardar ou almacenar para ser usada posteriormente. Non todas as magnitudes relacionadas coa enerxía se poden almacenar; na vindeira unidade deste módulo ha ver que a calor, unha magnitude relacionada coa enerxía, non se pode gardar; e o mesmo ocorre co traballo, que estudaremos no módulo 4.

A enerxía transfórmase

Outra das características da enerxía é que unhas formas da enerxía se poden transformar noutras; estudaremos isto con máis detalle na próxima unidade didáctica. Vemos aquí un exemplo de sucesivas transformacións da enerxía:

• A enerxía potencial da auga nun encoro transfórmase en enerxía cinética cando cae pola canle en dirección ás turbinas.
• Nas turbinas a enerxía cinética transfórmase en enerxía eléctrica.
• A enerxía eléctrica pódese transformar logo en enerxía luminosa, sonora, calor, enerxía cinética nun motor, enerxía potencial nun guindastre que eleva unha carga, etc.

A enerxía consérvase

Os cambios que experimentan os corpos e no contorno débense ás transformacións da enerxía. Pero a enerxía nin se crea nin se destrúe no proceso de transformación, xa que o seu valor total permanece constante. Esta característica da enerxía é un principio físico xeral baseado na experimentación científica, chamado principio da conservación da enerxía, que di o seguinte:

A enerxía nin se crea nin se destrúe; tan só se transforma.

Por exemplo, cando a pila dunha lanterna se esgota, a enerxía química proporcionada pola pila transformouse en luz e calor. Logo, a enerxía non se perde, transfórmase noutras formas de enerxía; e dicir a enerxía globalmente consérvase.

Daquela, se unha pedra a unha certa altura ten unha enerxía potencial de 3.000 J, cando chegue ao chan toda esta enerxía transfórmase en 3.000 J de enerxía cinética. A enerxía total do corpo non cambia, só cambia a súa forma.

Así, e segundo o principio da conservación da enerxía, estamos convencidos de que a enerxía total no universo é constante: nin aumenta nin diminúe.