Ao longo deste recurso fuches avanzando paso a paso por distintas tarefas: pensaches que é un boletín e para que serve, exploraches a súa estrutura, coñeciches as súas partes, investigaches modelos, escribiches textos informativos e de opinión, elaboraches recomendacións culturais, fixeches recensións literarias e aprendiches a comunicar dun xeito claro, ordenado e atractivo para quen vai ler. Agora xa non se trata de facer actividades por separado: é o momento de recoller todo o traballado e convertelo nun produto final real e con sentido.

Nesta fase, a redacción do teu centro convértese nun auténtico equipo editorial. Haberá que recuperar todos os textos creados ao longo do proceso, revisalos con atención, escoller os máis axeitados, melloralos se é necesario e decidir como van aparecer dentro do boletín. Cada sección conta e cada detalle importa: o título, a portada, o editorial, as novas culturais, as entrevistas, as recomendacións, as recensións, as imaxes, a distribución da información e mesmo a orde na que aparecerán os contidos. Todo suma para que o resultado final sexa claro, coidado e interesante.

Xa está todo case listo.
As páxinas toman forma.
As seccións encaixan.
As palabras atopan o seu lugar.

A imprenta está en marcha e o boletín cultural do centro está a piques de ver a luz.