Saltar navegación

4.2. Informamos

Escollede a vosa propia aventura..., informando!

Un breve informativo

Se estades aquí é porque escollestes redactar un breve.

Lede atentamente a presentación e seguide as indicacións das actividades que encontraredes a continuación.

Podédeslle preguntar as dúbidas que teñades á vosa profesora ou ao voso profesor.

Veña, a informar!

Lectura facilitada

Escollestes redactar un breve.

Por iso estades aquí.

Lede atentamente a presentación.

A continuación tedes as indicacións das actividades.

Seguide as instrucións.

Podédeslle preguntar as dúbidas que teñades á vosa profesora ou ao voso profesor.

Veña, a informar!

Lembras a diferenza entre información e opinión?

Na sección 2.1. deste reto aprendiches a distinguir entre información e opinión.

Viches que é importante saber cando hai que escribir ou falar de maneira máis obxectiva e cando o hai que facer de maneira máis subxectiva.

Pois agora, ao longo desta fase, terás que ir separando ou combinando a obxectividade e a subxectividade en distintas proporcións, coma se fosen os ingredientes dunha receita de cociña que hai que saber en que cantidades botar.

Lectura facilitada

Na fase 2.1. deste reto aprendiches algo importante.

Aprendiches a diferenza entre información e opinión.

Viches que ás veces temos que falar de maneira máis obxectiva.

En cambio, outras veces hai que falar de maneira máis subxectiva.

Pois agora imos facer un xogo.

A longo desta fase iremos combinando a obxectividade e a subxectividade.

Mesturarémolas en distintas proporcións,

coma se fose unha receita de cociña.

Informamos..., brevemente!

Se cadra pensas que un artigo de xornal sempre é un texto longo, pero non sempre é así.

Como puideches ler no glosario inicial da fase 4, un breve é unha noticia de pouca extensión na que se dan os datos principais dalgún feito acontecido, sen profundar no que pasou nin engadir información complementaria.

Un exemplo telo neste breve dedicado a dar unha noticia deportiva: 

Captura de pantalla dun breve do xornal Praza.gal

O breve está tirado da sección titulada "Fálase" do xornal Praza.gal, unha sección na que atopamos un adianto de novas que seguramente se ampliarán na sección do xornal que corresponda.

Preme aquí para accederes ao breve no sitio orixinal (abre en nova xanela).

Lectura facilitada

Pensas que un artigo de xornal sempre é longo?

Pois non sempre é así.

No glosario inicial da fase 4 aprendiches o que é un breve.

Un breve é unha noticia de pouca extensión.

Nesa noticia danse os datos principais dalgún feito.

Danse datos básicos sen afondar no que pasou.

Tampouco se engade información complementaria.

Un exemplo telo neste breve dedicado a dar unha noticia deportiva.

O breve é dun xornal chamado Praza.gal.

Concretamente, dunha sección que se titula Fálase.

Nesa sección atopamos un adianto de novas que se ampliarán noutra parte do xornal.

Creamos un breve..., rapidamente!

Tal como o nome indica, un breve explica unha noticia en moi poucas palabras, co obxectivo de transmitir unha información básica que sexa comprendida con rapidez.

Agora é a vosa quenda. Tedes que escribir un breve e, para que o consigades, explicarémosvos brevemente como o tedes que facer!

Lectura facilitada

Un breve explica unha noticia en moi poucas palabras.

Ten como obxectivo transmitir unha información básica.

Serve para comprender a información con rapidez.

Agora é a vosa quenda.

Tedes que escribir un breve.

Ímosvos explicar como o tedes que facer!

Que facemos?

Para facerdes o breve é moi importante que sigades estes pasos:

  1. Escollede un feito que acontecese nos últimos días no instituto. Mesmo pode ser no mesmo día no que traballedes. Non vos compliquedes: se é sinxelo, mellor. Que sexa algo sinxelo non quere dicir que non teña importancia. Por exemplo, quizais só podaron unhas árbores ou repararon algo que non funcionaba, pero pensade na relevancia que pode ter no voso día a día!
  2. Anotade a información básica (que pasou?, quen o fixo?, onde foi? etc.)
  3. Redactade, con esa información, un breve de non máis de 40 palabras.
  4. Relédeo ben para comprobar que se entende o que quixestes explicar.
  5. Revisade a ortografía, a gramática e o vocabulario por se se pode mellorar algo.

Lectura facilitada

É moi importante que sigades estes pasos:

  1. Escollede un feito que acontecese no instituto.
  2. Mellor que sexa un feito sinxelo.
  3. Anotade a información básica.
    • Que pasou?
    • Quen o fixo?
    • Onde foi?
    • Como pasou?
  4. Redactade un breve de non máis de 40 palabras.
  5. Relédeo ben para comprobar que se entenda.
  6. Revisade a ortografía e a gramática.
  7. Repasade o vocabulario.
  8. Comprobade se se pode mellorar algo.

Traballo por parellas

Organizade o traballo por parellas. Non cómpren máis persoas para facerdes un breve. Non é necesario repartir as tarefas: facédeo todo entre as dúas persoas.

Lectura facilitada

Organizade o traballo por parellas.

Para un breve chega con dúas persoas.

Non é necesario repartir as tarefas.

Facédeo todo entre as dúas persoas.

E gravámolos..., en pouco tempo!

Hai xornais e revistas que inclúen unha gravación en cada noticia para que as persoas con dificultades visuais a poidan escoitar.

Para complementar o breve, agora teredes que gravar un audio lendo o breve.

Non vos queixedes, que é curtiño!

Lectura facilitada

Hai xornais e revistas que inclúen unha gravación en cada noticia.

Así as persoas con dificultades visuais pódena escoitar.

Agora teredes que gravar un audio lendo o breve.

Non vos queixedes, que é curtiño!

Que necesitamos?

Aquí tes detallado, moi brevemente, o que precisas:

  1. O texto do breve unha vez revisado.
  2. Un dispositivo para gravar o son.
  3. O arquivo de audio da gravación cando xa estea feita.

Lectura facilitada

Aquí tes detallado o que precisas:

  1. O texto do breve revisado.
  2. Un dispositivo para gravar o son.
  3. O arquivo de audio da gravación cando xa estea feita.

E cando teñamos o arquivo?

Unha vez teñades os arquivos de audio, podédelos relacionar cun código QR para que todo o mundo os poida oír. A vantaxe dos códigos QR é que se poden incorporar tanto nunha publicación en liña coma nunha publicación en formato PDF.

Lectura facilitada

Primeiro hai que ter o arquivo gravado.

Despois pódese relacionar cun código QR.

Así poderaos oír todo o mundo.

Os códigos QR teñen unha vantaxe.

A vantaxe é que se poden incorporar en publicacións en liña,

pero tamén se poden poñer en publicacións en papel.

Son consciente do que escribín?

Agora toca facer unha reflexión sobre os breves que redactastes... con algo máis de vagar!

Podédelos ler e podédelos escoitar.

Cando os redactastes, limitástesvos a informar ou ás veces tamén se vos escapou a vosa opinión?

Quizais fostes moi conscientes de que estabades opinando...

Discutídeo na clase e tentade chegar a algunha conclusión.

Pódenvos axudar estas preguntas:

  1. Cando redactei o breve, só quería informar ou tamén quería opinar?
  2. Opinei sen darme conta?
  3. Se tamén opinei, dei unha opinión positiva ou negativa?

Lectura facilitada

Agora toca facer unha reflexión.

Podédelos ler e podédelos escoitar.

Pensade no que fixestes cando os redactastes.

Só informastes?

Algunha vez se vos escapou a vosa opinión?

Fostes conscientes de que estabades opinando?

Discutídeo na clase.

Tentade chegar a algunha conclusión.

Pódenvos axudar estas preguntas:

  1. Só quería informar ou tamén quería opinar?
  2. Opinei sen darme conta?
  3. Se tamén opinei, dei unha opinión positiva ou negativa?

Feito con eXeLearning (Nova xanela)