Como recomendamos un libro?
A redacción do IES Monte da Lúa quere recomendarlle ao alumnado a lectura do libro O que sei do silencio de Andrea Maceiras, que lles encantou. Para facelo, terán que elaborar unha recensión do libro, pero... que era iso dunha recensión?
Lectura facilitada
A redacción do IES Monte da Lúa fará unha recomendación.
Vai recomendar o libro titulado O que sei do silencio.
Este libro é dunha escritora que se chama Andrea Maceiras.
Ao alumnado gustoulle moito este libro.
O alumnado vai facer unha recensión do libro.
Sabedes o que é unha recensión?
Audio
Unha recensión é unha pequena xanela aberta a un libro. Non conta toda a historia, pero deixa ver o suficiente para espertar a curiosidade.
É un texto breve no que presentamos unha obra, damos unhas pinceladas do seu contido e, sobre todo, compartimos a nosa mirada como lectores: que sentimos, que pensamos, por que paga a pena (ou non) lela.
Unha boa recensión non revela segredos importantes (sen spoilers!), pero si convida a entrar na historia.
Lectura facilitada
Unha recensión é unha recomendación do libro.
Nunha recensión non se conta toda a historia.
Cóntase só un pouco para que dea gana de ler o libro.
A recensión é un texto breve
no que presentamos unha obra.
Tamén se fala un pouco do contido.
E tamén se comparte a nosa opinión sobre o libro.
Unha boa recensión non revela segredos do libro!
Audio
As partes dunha recensión
Toda recensión literaria adoita ter estes elementos:
Presentación do libro
- Título.
- Autor ou autora.
- Unha pequena introdución.
Primeiras impresións (portada e contraportada)
- Que nos suxire a portada?
- Que nos conta a contraportada?
Resumo breve
De que trata a historia, sen desvelar momentos clave.
Opinión persoal
A nosa experiencia como lectores e lectoras: emocións, valoracións ou recomendacións.
Lectura facilitada
As recensións adoitan ter estes elementos:
Presentación do libro
- Título.
- Autor ou autora.
- Unha pequena introdución.
Primeiras impresións (portada e contraportada)
- Que nos suxire a portada?
- Que nos conta a contraportada?
Resumo breve
No resumo cóntase de que trata a historia.
Pero nunca se desvelan momentos clave.
Opinión persoal
Na opinión persoal fálase da nosa experiencia.
A nosa experiencia como lectores e lectoras é importante.
Pódese falar de emocións.
Tamén se pode facer unha valoración do libro.
E mesmo se poden recomendar lecturas.
Audio
Como a elaboramos?
Para escribir unha boa recensión, sigue estes pasos:
Como facer unha recensión?
1. Achégate ao libro
Observa a portada, le a contraportada e mergúllate na lectura.
2. Toma notas
Que che chamou a atención? Que destacarías?
3. Organiza as ideas
Comeza presentando o libro, continúa co resumo e remata coa túa opinión.
4. Escribe con coidado
Emprega unha linguaxe clara, pero tamén persoal e expresiva.
5. Revisa o texto
Asegúrate de que:
- Non hai spoilers.
- Está ben estruturado.
- Resulta interesante para quen o lea.
Lectura facilitada
Sigue estes pasos para escribir unha boa recensión:
Como facer unha recensión?
1. Achégate ao libro
Observa a portada.
Le a contraportada.
Mergúllate na lectura.
2. Toma notas
Que che chamou a atención no libro?
Que destacarías do libro?
3. Organiza as ideas
Comeza presentando o libro.
Continúa co resumo.
Remata dando a túa opinión.
4. Escribe con coidado
Emprega unha linguaxe clara.
Tamén pode ser unha linguaxe persoal,
coma se falases á túa maneira.
5. Revisa o texto
Asegúrate de que:
- Non hai spoilers.
- Está ben estruturado.
- Resulta interesante.
Audio
Unha mostra de recensión
Hai historias que non falan só do que pasa…, senón do que calamos. Iso é o que nos propón O que sei do silencio, de Andrea Maceiras.
Desde a primeira frase, o libro xa impacta: a protagonista, Delia, recoñece que foi parte dun caso de acoso no seu instituto. Non como agresora directa, senón como alguén que viu o que pasaba…, e non fixo nada. A través dun blog, decide contar o sucedido e enfrontarse ao seu propio silencio.
A novela sitúanos nun instituto onde unha alumna nova, Silke, comeza a sufrir acoso por parte dun grupo de compañeiras. A historia non só mostra o que ocorre, senón tamén como ese comportamento se estende e como outras persoas, por medo ou por querer encaixar, acaban formando parte do problema .
O máis interesante do libro é precisamente o punto de vista: non o da vítima nin o da acosadora principal, senón o dunha testemuña que se sente culpable. Iso fai que a historia sexa moi real e incómoda, porque obriga a pensar: que fariamos nós nunha situación así?
Persoalmente, pareceume unha lectura moi dura, pero necesaria. Non é un libro para “pasar o tempo”, senón para reflexionar sobre o que significa calar e sobre as consecuencias que pode ter non actuar. Ademais, a forma de contar a historia, a través dun blog e distintas voces, faina moi actual e fácil de ler.
Recomendaría este libro a todo o alumnado, especialmente porque trata un tema moi próximo como o acoso escolar e fai que nos cuestionemos o noso papel como espectadores. Un libro que non deixa indiferente.
Lectura facilitada
Hai historias que non falan só do que pasa.
Son historias que falan tamén do que non dicimos.
Iso é o que fai a novela O que sei do silencio.
Esta novela é da escritora Andrea Maceiras.
O libro impacta desde a primeira frase.
A protagonista chámase Delia.
Delia foi testemuña dun caso de acoso.
Unha testemuña é unha persoa que ve o que pasa.
Delia decide contar o que pasou nun blog.
Decide non quedar en silencio.
A novela sitúanos nun instituto.
Nese instituto hai unha alumna nova chamada Silke.
Esta alumna nova comeza a sufrir acoso.
Acósana unhas compañeiras.
A historia mostra o que ocorre.
Tamén explica que moitas persoas acaban acosando a vítima.
Acaban formando parte do problema.
O máis interesante do libro é o punto de vista.
Non fala a vítima nin a acosadora.
Quen fala é unha testemuña que se sente culpable.
Iso fai que a historia sexa moi real.
Tamén é unha historia incómoda.
Unha historia que nos obriga a pensar.
Que fariamos nós nunha situación así?
Persoalmente, pareceume unha lectura moi dura.
Paréceme tamén unha lectura necesaria.
Non é un libro para “pasar o tempo”,
é un libro para reflexionar.
O libro fai reflexionar sobre as consecuencias que pode ter non dicir nada.
Ademais, a historia é actual e tamén é fácil de ler.
Eu recomendaría este libro a todo o alumnado.
Trata un tema moi próximo.
Fai que nos cuestionemos o noso papel como espectadores.
É un libro que non deixa indiferente.
