É moi importante que aprendamos a dar as nosas opinións desde a calma. Non sempre é fácil, pero os diálogos son moito máis proveitosos cando se intercambian pareceres con tranquilidade, porque se nos poñemos nerviosas e nerviosos podemos acabar nunha discusión.

Convidámosvos a facer unha reflexión e a ir respondendo, entre todas e todos, as seguintes preguntas:

• En que momentos é importante priorizar o relato obxectivo dos feitos?
• Cando é importante, en cambio, introducir opinións e dar unha visión máis subxectiva?
• Se falamos coa familia, por exemplo, podemos ser sempre subxectivas e subxectivos?
• No centro educativo, só podemos ser obxectivas e obxectivos?
• Melloraría a convivencia se nunca expresásemos as nosas opinións nin as nosas emocións?

Pode ser moi útil ter un papel e un bolígrafo á man para ir anotando as ideas que vaian xurdindo ao longo do debate.

Seguro que aparece moito material que pode ser útil para un artigo de opinión, ou simplemente para facer unha crónica do debate e publicala no boletín.

Aproveitade o traballo feito!