A materia segundo a súa composición
Como xa vimos ao longo do REA, a materia é todo aquilo que ten masa e ocupa un volume. Con respecto a composición da materia podemos diferenciar:
- Substancias puras: a súa composición non cambia. Estas sustancias non se poden separar mediante métodos físicos. Un exemplo sería a auga. Podemos atopala auga en diferentes lugares ou formas; pero sempre ten a mesma composición.
- Mesturas: a súa composición cambia. Están formadas por dous ou máis tipos de substancias, que se poden separar por métodos físicos. Un exemplo sería a auga de mar que está formada por auga e sales.
Hai dous tipos principais de mesturas
Mesturas heteroxéneas
Son aquelas nas que si se poden ver ou separar os compoñentes. Se abrimos un ovo podemos observar a clara, a xema e a casca. Estas partes son diferentes e pódense ver e separar facilmente. Isto fai que o ovo sexa unha mestura heteroxénea.
Mesturas homoxéneas
Son aquelas nas que non se poden distinguir os compoñentes (as substancias que mesturamos). Se batemos a clara e a xema dun ovo teremos unha mestura homoxénea, porque non podemos distinguir as partes a simple vista.
Algunhas veces, queremos separar as substancias dunha mestura. Aquí hai algúns métodos que podemos usar:
Filtración
Úsase para separar sólidos de líquidos. Por exemplo colar a auga con area.
Decantación
Serve para separar dous líquidos que non se mesturan, como o aceite e a auga. O aceite queda arriba e a auga abaixo, e podemos quitalos por separado.
Destilación
Serve para separar dous líquidos que se poden mesturar entre si. Non todos os líquidos pasan ao estado gasoso á mesma temperatura, uns fano a temperaturas máis baixas e outros a mais altas. A destilación aproveita esta propiedade para separar os gases.
Evaporación
Se temos unha mestura de auga con sal, quentamos a auga ata que pasa a estado gasoso e o sal quedará no fondo.
Tamizado
Úsase para separar sólidos de diferentes tamaños, como area e pedras pequenas.
Podes ter mais información sobre os métodos de separación vendo este vídeo:
Lectura facilitada
A materia é todo o que ten masa e ocupa un volume.
Con respecto a composición da materia podemos diferenciar:
- Nas substancias puras a súa composición non cambia. Un exemplo sería a auga.
- Nas mesturas a súa composición cambia. Están formadas por dous ou máis tipos de substancias. Un exemplo sería a auga de mar.
Hai dous tipos principais de mesturas:
- Nas mesturas heteroxéneas pódense ver ou separar os compoñentes. As partes do ovo forman unha mestura heteroxénea: a clara, a xema e a casca. Estas partes son diferentes e pódense ver e separar facilmente.
- Nas mesturas homoxéneas non se poden distinguir os compoñentes (as substancias que mesturamos). Ao bater a clara e a xema dun ovo teremos unha mestura homoxénea.
Para separar mesturas de materias podemos empregar:
- Filtración: úsase para separar sólidos de líquidos. Por exemplo colar a auga con area.
- Decantación: serve para separar dous líquidos que non se mesturan, como o aceite e a auga. O aceite queda arriba e a auga abaixo. Podemos quitalos por separado.
- Destilación: serve separar dous líquidos que se poden mesturar entre si. A destilación aproveita que os líquidos se evaporan a distinta velocidade.
- Evaporación: se temos unha mestura de auga con sal, deixamos que a auga se evapore e o sal quedará no fondo.
- Tamizado: úsase para separar sólidos de diferentes tamaños, como area e pedras pequenas.
Parácheste a pensar que as persoas cociñeiras pasan todo o día a facer mesturas na cociña? A cociña ten unha parte moi importante de ciencia.