Saltar navegación

3.1. Formación de equipos

 

Glosario

Átomo 

Átomo

Definición:

Unidade básica que compón a materia

Exemplo:

O núcleo do átomo está composto por partículas chamadas protóns e neutróns.

Composición

Puzzle

Definición:

Elementos polos que está formado algo.

Exemplo:

A composición da auga é un átomo de osíxeno e dous de hidróxeno (H₂O).

Elementos químicos

Pictograma no que se poden ver unhas probetas misturando elementos

Definición:

Son as substancias que compoñen a táboa periódica.

Exemplo:

Hai 118 elementos químicos na táboa periódica entre os que están o osíxeno, aluminio, ferro etc.

Heteroxéneo

Heteroxéneo

Definición:

Que está formado por elementos de distinta natureza ou diferentes.

Exemplo:

Unha macedonia é unha mestura heteroxénea formada por froitas.

Formación de grupos

Varios tipos de Humpty formando un equipo.

O primeiro que ides crear son os grupos de traballo, que se manterán durante todas as sesións desta situación de aprendizaxe ata alcanzar o reto final. Xuntos realizaredes as actividades que vos proporemos, axudándovos e avaliándovos entre vós para aprender xuntos.

A idea é crear un grupo heteroxéneo para afrontar todas as actividades, onde poidades participar e realizar achegas libremente segundo as vosas habilidades, fortalezas e características individuais.

Aínda que a clase se agrupe en diferentes equipos de traballo, todos tendes un obxectivo común: crear un prototipo aplicando diferentes coñecementos científicos.

A cooperación é unha das mellores maneiras de aprender. Se algún equipo precisa axuda e ti e mailo teu grupo pode axudarlles, non dubides en facelo. 

Estás preparado para saber quen será parte do teu equipo? Pois adiante!

Lectura facilitada

Crearedes grupos de traballo que se manterán durante todas as sesións.

Xuntos realizaredes actividades,  axudándovos e avaliándovos entre vós.

Debedes crear un grupo equilibrado onde todos e todas poidades participar e realizar achegas.

Todos tendes o obxectivo de crear prototipos. 

A cooperación é unha das mellores formas de aprender. Se algún equipo precisa axuda e ti podes axudarlles, non dubides en facelo. 

Estás preparado para saber quen será parte do teu equipo? Pois adiante!

Actividade para creación de grupos

Duración:
20 min
Agrupamentos:
Toda a clase

Elementos químicos ao redor dunha pizarra con fórmulas químicas.

É o momento de formar os equipos. Para iso a mestra/e vaiche repartir unha tarxeta onde veñen recollidos os átomos que compoñen unha materia en concreto.

Andando pola clase deberás buscar os compañeiros e compañeiras que teñan a mesma composición. Unha vez que esteades xuntos, buscaredes información sobre esa materia e escribiredes nun folio os seguintes datos:

1. Fórmula da composición.

2. Nome dos elementos químicos.

3. Materia que forman e estado no que se atopa (indica se é sólido, líquido ou gasoso en condicións normais).

4. Como é a súa presencia ou uso na vida humana.

Ficha de grupo

Unha vez formados os grupos, debedes cubrir o voso caderno de equipo, no que figurará:

  1.  Un nome e imaxe para o equipo.
  2. As persoas integrantes do equipo.
  3. Os obxectivos que pretendedes conseguir en equipo.
  4. Os compromisos que fai cada integrante do equipo para conseguilos.

Descarga: Ficha de equipo en formato PDF (Abre en nova xanela)

Lectura facilitada

Unha vez creado o grupo debedes cubrir a ficha de grupo. 

Teredes que elixir un nome de equipo, anotar a todos os membros e firmar as normas e condicións de uso.

Queres que o teu grupo teña éxito?

Fíxate nos seguintes aspectos:

  • Participación: debedes de colaborar e participar activamente todos os membros do grupo.
  • Clima de traballo: Ter un bo ambiente é esencial. Sé educado e respectuoso cos demais. Todos traballaredes máis cómodos.
  • Posta en común de ideas: Fai achegas que teñan valor e respecta tamén as opinións dos teus compañeiros e compañeiras. Xuntos chegaredes a mellores propostas se  argumentades ben as vosas opinións.
  • Seguimento do voso traballo: Analizade como o ides facendo e corrixide a tempo as cousas que poidades. Propoñede mellores solucións se vedes que as cousas non están saíndo como deben.
  • Autonomía: un grupo que ten éxito sabe organizarse e traballar sen apenas axuda. Se precisades axuda pedídea, non o dubidedes! Recordade que sodes nenos e nenas e aínda e estades a aprender como cooperar e con algún consello cada vez iredes sendo máis autónomos e funcionando mellor.

Se queres ver como serán as valoracións do traballo en grupo, revisa a rúbrica do punto 5.2 na seguinte ligazón: Rúbrica do traballo en equipo.

Lectura facilitada

Buscades o éxito? Fíxate no seguinte:

  • Participación: debedes colaborar e participar todos e todas.

  • Clima de traballo: Sé educado e respectuoso cos demais. Todos traballaredes máis cómodos.

  • Posta en común de ideas: Fai achegas de valor e respecta as opinións dos demais.

  • Seguimento do voso traballo: Analizade e corrixide a tempo as cousas que poidades. Propoñede novas solucións se vedes que as cousas non saen como deben.

  • Autonomía: un grupo de éxito sabe traballar sen apenas axuda, pero se a precisades, pedídea! Aínda estades a aprender.

  • Se queres saber como se valorará o traballo en grupo, revisa a rúbrica do punto 5.2.

Feito con eXeLearning (Nova xanela)