Como se datan os descubrimentos?

Man cun pincel limpando un esqueleto dun animal Para datar achados históricos empréganse diferentes métodos científicos que axudan a saber a idade dos obxectos atopados en escavacións. Estes métodos son a datación directa e a datación indirecta.

Datación Directa

Datación directa: analízase directamente o material dun obxecto para saber a súa idade.

Carbono 14

Permite saber a idade de restos orgánicos (ósos, madeira ou tecidos, entre outros) ata uns 50.000 anos de antigüidade. Este método baséase na descomposición do carbono. Medindo esta descomposición saberemos a que ano pertenceu.

Termoluminiscencia

Úsase para datar cerámica e obxectos de barro cocido. Mide a luz emitida polos minerais cando se quentan, permitindo saber cando foron cocidos por última vez.

Datación Indirecta

Datación indirecta: Estímase a idade en base ao contexto, xa que non se pode analizar o material directamente.

Estratigrafía

Analiza as capas do solo onde están os obxectos. Os máis profundos son máis antigos.

Tipoloxía

Comparación de obxectos similares xa datados (por exemplo, comparar unha nova ánfora atopada cunha xa coñecida).

Importante!

Importante! Antes de comezar a responder, le con atención a descrición de cada obxecto, fíxate ben nas pistas e reflexiona sobre as preguntas guía.

A resposta non está oculta... está agardando que a descubras co teu razoamento!

Actividade grupal: Datando obxectos

Como sabes, varios obxectos de distintas épocas acabaron mesturados coa carta de María de Souto. Tes que descubrir de que época son cos teus compañeiros e compañeiras. Seredes capaces de interpretar as pistas?

Como organizar a actividade:

Formade pequenos grupos
Debatede como datariades o obxecto.
Decidide a que época credes que pertence.
Finalmente, poñede en común e explicade o voso razoamento.

Podes descargar o documento para recoller os datos na seguinte ligazón. Lembra gardalo ao remate. Consulta co profesorado o xeito de cubrilo.

Accede ao recurso "Detectives da Historia" para imprimir.
Accede ao recurso "Detectives da Historia" par a cubrir no ordenador (máis sostible).

Grupo 1

Biface

Descrición:
Obxecto de pedra tallado a man, empregado como ferramenta para cortar ou raspar.

Pistas:

Non hai escritura.
Fabricado a man sen metais.
Moi antigo.

Preguntas guía:

De que material está feito este obxecto?
Hai restos orgánicos?
Que método sería mellor: carbono 14, estratigrafía ou comparación?

Grupo 2

Espada de bronce

Descrición:
Obxecto metálico usado para a guerra. Fabricado coa aliaxe de bronce.

Pistas:

Uso de metais.
Obxecto traballado.

Preguntas guía:

Pódese datar usando carbono 14? Por que si ou por que non?
Cal sería o método máis axeitado?

Grupo 3

Moeda

Descrición:
Peza metálica redonda cunha inscrición en latín e a imaxe dun emperador.

Pistas:

Ten inscricións e símbolos.
A figura representa un personaxe importante.
Pode indicar unha época ou reinado.

Preguntas guía:

Que información podemos extraer da inscrición e da imaxe?
A inscrición pode axudarnos a datar?
Que método usariamos?

Grupo 4

Ánfora

Descrición:
Recipiente de cerámica decorado con escenas da vida cotiá en Grecia.

Pistas:

Cerámica con decoracións.
Estilo recoñecible.

Preguntas guía:

Podemos comparar este obxecto con outros coñecidos?
Sería útil a comparación de estilos para datar?

Grupo 5

Inscrición en pedra

Descrición:
Texto escrito en latín gravado sobre pedra.

Pistas:

Ten escritura.
Podemos ler datas ou nomes.

Preguntas guía:

A escrita pode axudarnos a datar?
Que método usariamos?