Moneras

O reino Moneras inclúe organismos microscópicos e unicelulares, como as bacterias e as arqueas. As moneras teñen células procariotas. Como verás no apartado 3.4, as procariotas son células moi sinxelas, sen núcleo, e, xa que son unicelulares, de ningún xeito poden formar tecidos.

O feito de seren microscópicas fai que pasen desapercibidas para o ollo humano, máis as bacterias e arqueas están moi presentes nas nosas vidas e nos ecosistemas terrestres. Algunhas viven como simbiontes, tanto no corpo humano como nos animais, nestes casos as bacterias aportan beneficios. Tamén poden ser parasitas e causar enfermidades. As bacterias son imprescindibles nos procesos de descomposición da materia e na súa reciclaxe para incorporarse aos solos.

No reino Moneras temos organismos autótrofos e heterótrofos (conceptos xa estudados), que poden vivir en moitos ambientes distintos. Dicimos, por iso, que son cosmopolitas. Aparecen bacterias en ambientes extremos como zonas salgadas, augas termais ou ambientes moi fríos.

Algunhas bacterias son moi útiles para nós, xa que se utilizan na industria alimentaria. Por exemplo, na elaboración de iogur interveñen as bacterias. Tamén se usan para producir medicamentos. Ao uso de organismos para mellorar as nosas vidas chamámoslle biotecnoloxía.

Protoctistas

O reino protoctista inclúe distintos tipos de organismos moi diversos, desde os protozoos ata as algas. Están formados por células eucariotas. Como verás no apartado 3.4, as eucariotas son células máis complexas, con núcleo.

A maioría dos organismos do reino protoctista son microscópicos como os protozoos ou as algas microscópicas, pero tamén pertencen a este reino as algas macroscópicas, que podemos ver nas nosas costas que son pluricelulares, pero non teñen tecidos especializados.

Respecto á súa nutrición, poden ser autótrofos ou heterótrofos.

A maioría viven na auga, tanto doce como salgada, ou senón en ambientes húmidos ou no solo.

Boa parte do plancto pertence ao reino protoctista.

Fungos

Os fungos son organismos que ás veces confundimos cos vexetais, máis non o son. Os fungos están formados por células eucariotas e poden ser macroscópicos, ou microscópicos unicelulares, como os lévedos.

Nos fungos macroscópicos, a parte que vemos a simple vista é o cogomelo, estrutura reprodutora que produce esporas. É o caso do champiñón ou doutros cogomelos que podemos ver na nosa contorna.

Os fungos son moi importantes nas nosas vidas, poden causar beneficios, pero tamén prexuízos. O lévedo do pan é un exemplo de fungo beneficioso, e os fungos parasitos, causantes de enfermidades como a candidiase, son prexudiciais.

Os fungos son heterótrofos e, nos ecosistemas, fan unha importante tarefa, xa que descompoñen e transforman a materia facilitando a súa incorporación ao solo para que poida, de novo, ser utilizada polas plantas.

Plantas

O reino das plantas inclúe organismos autótrofos e fotosintéticos que teñen células eucariotas, con cloroplastos, que son os orgánulos celulares responsables da fotosíntese. As células das plantas teñen parede celular, composta por celulosa como compoñente principal, o que as diferencia doutras paredes celulares como as dos fungos e as algas.

As plantas teñen tecidos especializados para realizar distintas funcións.

Outra das características das plantas é que, na maioría dos casos, non se desprazan.

As plantas poden ter reprodución sexual ou asexual.

Pertencen a este reino as árbores, os fieitos, os musgos e as plantas herbáceas.

Animais

O reino dos animais é un dos que nos resulta máis familiar e coñecido, xa que nós mesmos pertencemos a este reino e os animais cos que convivimos e nos relacionamos, tamén.

As características que comparten os organismos pertencentes a este reino é que son eucariotas pluricelulares con tecidos, heterótrofos, e que se reproducen maioritariamente de xeito sexual, aínda que hai casos de reprodución asexual en animais.

Os animais teñen un sistema nervioso máis ou menos complexo e órganos e tecidos especializados en realizar funcións específicas, o que tamén os diferencia doutros reinos. O feito de poderen desprazarse tamén é unha característica moi relevante dos animais.