4.1. Tomando decisións

Mans á obra

Decidimos e organizamos

Traballando primeiro en pequeno grupo e despois en gran grupo e coordinados pola persoa docente, ides decidir o espazo natural sobre o que faredes o voso calendario.

Investigamos:

• Recorda que, na fase 1, puideches consultar o mapa interactivo no que aparecen os distintos espazos naturais de Galicia. Localiza os que teñas preto do teu centro.
• Outra fonte de consulta pode ser o concello ou outras entidades, como asociacións veciñais, asociacións ambientais e de tempo libre.
• Non esquezas os "máis vellos do lugar". As persoas maiores son unha fonte de sabedoría e coñecían o territorio moi ben. Búscaos para obter información.

Analizamos e decidimos:

Agora que xa tes toda a información toca analizala. Primeiro, en pequeno grupo, e despois con toda a aula debatemos para acordar sobre que espazo natural traballaremos.

Agora, dentro de cada grupo tedes que facer a escolla do  tipo de calendario. Debedes decidir entre distintas opcións:

• Calendario mensual.
• Calendario trimestral.
• Calendario cun cartel anual.
• Calendario de sobremesa.
• Outros...

O formato de traballo é outra decisión importante a tomar. Podedes escoller algunha destas opcións:

• Formato dixital colaborativo, con ferramentas como Canva, Genially ou semellantes, que teñen versións gratuítas e poden ser unha boa opción.
• Formato dixital individual. Con calquera ferramenta que vos decidades.
• Formato manual. Facendo os vosos deseños á man. Repartimos o choio.

Organizámonos:

 Axudados pola persoa docente, faredes a asignación de tarefas aos distintos grupos. A listaxe de tarefas deberá ser algo semellante a isto:

• Recompilación de imaxes. Deberán ser fotografías ou debuxos propios.
• Elaboración de textos.
• Deseño e integración de imaxes e texto.
• Elaboración do documento final e impresión do calendario.