Glosario

Bioloxía molecular

Definición:: Parte da bioloxía que se ocupa das moléculas que forman os seres vivos.
Exemplo:: A bioloxía molecular estuda o ADN.

Categoría taxonómica

Definición:: Cada un dos grupos nos que se clasifican os seres vivos.
Exemplo:: A especie é unha categoría taxonómica.

Taxonomía

Definición:: Parte da ciencia que se ocupa da clasificación dos seres vivos.
Exemplo:: Grazas á taxonomía, podemos entender mellor as relacións entre as diferentes especies de seres vivos.

Poñendo orde na biodiversidade

clasificación seres vivos

Neste apartado veremos como os científicos e científicas puxeron orde na biodiversidade para simplificar o seu estudo.

Xa vimos que os seres vivos son moi parecidos nalgunhas cousas e moi distintos noutras, agora toca poñer orde. Para facelo, os científicos e científicas clasificaron os seres vivos en distintos grupos segundo a súa orixe e as súas características, establecendo distintas categorías taxonómicas. A taxonomía é a parte da ciencia que se encarga de establecer esta clasificación.

Os grupos máis grandes inclúen categorías máis pequenas. Por exemplo, o reino animal contén distintos filos, e, cada filo, contén, á súa vez, distintas clases e as clases conteñen á súa vez distintas ordes, e así sucesivamente. Dentro de cada grupo, os organismos teñen características comúns tanto a nivel interno (xenético e molecular) como a nivel externo (características externas observables).

A día de hoxe, debido aos avances na bioloxía molecular, os criterios de clasificación internos colleron máis relevancia.

Lectura facilitada

Neste apartado veremos como os científicos e científicas puxeron orde na biodiversidade para simplificar o seu estudio.
Os seres vivos teñen características moi distintas entre si.
Para axudar ao seu estudo fixéronse grupos de seres vivos que teñen características comúns. A estas agrupacións chámaselles categorías taxonómicas.
Unhas categorías taxonómicas poden incluír a outras máis pequenas. Por exemplo, no grupo "reino animal" temos o grupo das "aves", o grupo dos "mamíferos" e outros.
As categorías taxonómicas establécense en función das características internas (xenéticas e moleculares) e externas (características observables).

Analizamos un exemplo

Na seguinte imaxe podes ver as categorías taxonómicas ás que pertence o raposo, Vulpes vulpes.

raposo

A categoría máis pequena na que está é a de especie, xa que está el só. Esta categoría non pode ter máis dun elemento.

A seguinte categoría na que está é a de xénero. Pertence ao xénero Vulpes, no que hai preto de 20 especies, como o Vulpes lagopus.

A familia á que pertence é a dos cánidos, que ten unha morea de xéneros e especies como o lobo e o can (Canis lupus), o coyote (Canis latrans) ou o can salvaxe africano (Lycaon pictus).

A medida que ascendemos nos grupos, temos máis especies, pero ten en conta que tamén comparten menos características. O can e o raposo, que pertencen á mesma familia, comparten máis características que o raposo e o cangrexo, que pertencen ao reino animal.

Lectura facilitada

As categorías taxonómicas son: dominio, reino, filo, clase, orde, familia, xénero e especie
Por exemplo, no raposo, a categoría máis pequena é a de especie, Vulpes vulpes xa que está el só.
A seguinte categoría é a de xénero. Pertence ao xénero Vulpes, no que hai preto de 20 especies, como o Vulpes lagopus.
A familia á que pertence é a dos cánidos, que ten unha morea de xéneros e especies como o lobo e o can (Canis lupus).
A medida que ascendemos nos grupos, temos máis especies, que tamén comparten menos características.
O can e o raposo, que pertencen á mesma familia, comparten máis características que o raposo e o cangrexo, que pertencen ao reino animal.