Glosario

Desertización

Definición:: Degradación dos solos en zonas nas que a vexetación diminúe ou desaparece e tamén o fai a produtividade dos seus ecosistemas.
Exemplo:: Os solos de zonas áridas e semiáridas sufriron procesos de desertización.

Efecto invernadoiro

Definición:: Proceso natural e beneficioso que permite que a temperatura do planeta se manteña nuns valores aptos para a vida na Terra.
Exemplo:: Hai actividades humanas que producen gases que incrementan o efecto invernadoiro e, polo tanto, a temperatura da superficie do planeta.

Sobreexplotación

Definición:: Extracción e consumo dalgún tipo de recurso natural por riba do seu límite de recuperación ou renovación.
Exemplo:: A sobrepesca que leva ao esgotamento dos recursos pesqueiros dunha zona é un tipo de sobreexplotación dos recursos naturais da biosfera.

Imos co noso ECOcongreso!

Logo ECOcongreso

Chegar e encher non cadra co procedemento científico!

Para que todo saia ben, temos que ir pasiño a pasiño, así que imos seguir estas fases na organización e elaboración do noso ECOcongreso, e verás que ben sae:

ECOcongreso

1º Creación de grupos de investigación

Crearedes pequenos grupos de investigadoras/es especialistas nos compoñentes dos ecosistemas e os seus principais impactos relacionados directa ou indirectamente coas actividades humanas.

2º Elaboración de documentación e organización do desenvolvemento

Elaboraredes presentacións, documentos, infografías... Así como distribuiredes as intervencións, os espazos e os tempos do congreso

3º Celebración do ECOcongreso

O congreso terá lugar ao longo de dúas xornadas, e preferiblemente, nun lugar accesible a todos os membros da comunidade educativa.

4º ECOconclusións, ECOmanifesto e ECOlibro

Elaboraredes un documento que incluirá, a partir das conclusións do congreso, os compromisos medioambientais adquiridos durante a súa celebración, e que perdurará nos andeis da biblioteca do centro.