A humanidade debe ser consciente da necesidade de protexer e conservar os nosos ecosistemas e os seus recursos naturais; da súa protección e conservación dependen as nosas posibilidades de supervivencia como especie.

Seguro que algunha vez escoitaches falar da problemática do quecemento global. É unha realidade na evolución do planeta nos últimos anos e un problema global que nos afecta a todas e todos.

Necesitamos o noso planeta para vivir; o necesitamos e é urxente protexelo e, na medida do posible, recuperalo e conservalo para as seguintes xeracións.

Para poder facelo é necesario acudir á ciencia e fuxir de argumentacións sen base científica e que poñen en dúbida, ou directamente negan, a situación na que se atopa agora mesmo o noso fogar: a nosa Ecosfera e os seus ecosistemas.

E, cada vez máis, temos as ferramentas para facelo; así, temos o coñecemento científico e temos tamén a tecnoloxía, cada vez máis precisa e con posibilidades de ser aplicable aos problemas medioambientais.

As listaxes de medidas posibles para vivir dun modo sostible son longas e moi variadas.

Pero, por desgracia, non son suficientes.

Debe a humanidade facer un gran cambio nos seus paradigmas e modos de vida, sempre respectando a diversidade social e cultural, pero sen esquecer un obxectivo que debe ser global: incorporar nas nosas vidas hábitos saudables para o medio natural e os compoñentes dos ecosistemas; é dicir, vivir de forma sostible.

Neste camiño cara á sostibilidade, a lexislación ambiental é fundamental pero é moi importante tamén a educación ambiental.

Coñecer a historia do noso planeta, a historia da súa relación coa especie humana, as condicións de equilibrio que permitiron a orixe e evolución dos organismos que forman a Biosfera na Terra e as súas posibilidades de recuperación (se a humanidade pon en marcha medidas e hábitos de sostibilidade) é fundamental para conservar e protexer os nosos ecosistemas, os nosos auténticos fogares.