Para escoller unha ambientación onde aconteza a historia, pensade nunha zona que todos coñezades e que teña, a poder ser, unha lenda ou historia asociada.

Para isto, é necesario que busques información en internet e preguntes ás persoas maiores da vosa contorna, que de seguro teñen moito que contar!

Facede unha posta en común e escollede cal se presta máis para a vosa historia.

Podedes incluso abordar o poema neste momento. Propoñemos un exemplo extraído dunha cantiga tradicional:

Pontevedra é boa vila

Pontevedra é boa vila
dá de beber a quen pasa;
a fonte na Ferrería,
San Bartolomeu na praza.
Pontevedra é boa vila
vila de moitas señoras
e a Virxe da Peregrina
é a mellor entre elas todas. 

Rico, M. No bico un cantar.

Tamén tedes exemplos en autores como Curros Enríquez:

Preto da cibdá de Ourense
camiño de Celanova,
onde é máis tépedo o vento
que a terra gallega azouta,
dun círcolo de montanas
na faldra, sempre verdosa,
esténdese un val frorido,
cuberto de herbas cheirosas,
piñeirales i arboledos
ricos de frutas e sombra.

Curros Enríquez, M. (1880). "A virxe do Cristal" , Aires d'a Miña Terra. La Ilustración Gallega y Asturiana. 

Para crear unha situación tedes que ter en conta como vai a transcorrer a escena. 

• Protagonistas.
• Vai ter narrador/ voz en off.
• Sobre que vai tratar. Tede en conta o obxectivo final do reto.
• Indicar se hai movementos ou algunha indicación en escena (acotacións).
• Lembrar as normas dos diálogos (non solaparse). 

Presentámosche un exemplo de comezo dunha obra de teatro para que te fagas unha idea e observes os detalles necesarios a incluír.

A obra é: Quintanilla, X. (1997). Donosiña: Drama en tres autos e un prólogo. Universidade da Coruña.

Un elemento característico dunha lenda é que mestura feitos reais con outros ficticios, dándolle un halo máxico ao relato.

Como xa comentamos con anterioridade, Galicia é unha terra onde abondan as lendas e as criaturas máxicas, de aí que se diga dela que é unha terra meiga.

Porén, ademais de procurar información na vosa contorna (familia, coñecidos, centros culturais ou mesmo biblioteca), tedes moitas páxinas que falan sobre lendas en Galicia. A máis coñecida delas é A Galicia encantada, onde hai contos, poemas ou microhistorias que quizais se localicen na vosa contorna ou preto de onde queirades realizar a vosa obra de teatro.

Tamén podedes, como non, inventar unha dende cero ou inspirarvos nas múltiples lendas existentes no noso territorio.

• O poema debe ter unha extensión mínima de 8 versos.
• A súa temática é libre máis, como suxestión, podería ter que ver coa historia, co lugar ou cun personaxe que apareza na historia, circunstancia que axudaría para a consecución do reto final.
• Pode aparecer en varias partes da representación teatral:
  - Ao principio, a modo de prólogo ou, como xa indicamos, no punto referente á localización.
  - No medio da obra, formando parte importante do transcorrer da mesma.
  - Ao final. Resultando unha conclusión/ resumo ou incluso unha ensinanza do acontecido.
• Lembra repasar os distintos autores que viñemos traballando nas fases anteriores. 

Tedes que ter claro a forma na que queredes representar a obra, do mesmo xeito que tedes que pensar en como presentar o tríptico final.

Tedes multitude de formatos audiovisuais utilizando un portátil de aula ou da biblioteca. 

Deseguido presentámosche unha serie de ideas para axudar a tomar decisións:

• En canto ao audio hai varias opcións:
  - Podedes usar o ordenador de aula.
  - Podedes buscar no voso centro se contades con material audiovisual, como por exemplo micros (a poder ser panorámicos), adaptadores RCA, micros de "petaca" ou de "botón" ou mesa de gravación.
  - Para a edición do audio tedes a opción de utilizar o programa Audacity, xa que manexa un software libre e permite editar e engadir efectos de sons e normalmente atópase instalado nos ordenadores de aula.
• En canto ao vídeo:
  - Podedes desprazarvos ao lugar ou representalo no centro utilizando algunha decoración escénica.
  - Para o material váleche unha ou varias cámaras fixas ou mesmo utilizando a cámara web do ordenador de aula.
  - Unha vez gravado, para editalo podes compaxinar Audacity con OpenShot, xa que tamén é un software libre e normalmente instalado nos diferentes ordenadores de aula.
•  Outras técnicas de edición: podedes consultar videotitoriais sobre como facer un croma e inserir imaxes dos lugares representativos.