Xa tes pensado e esbozado o teu circuíto e chega a hora de facelo realidade. Necesitarás poñerte a proba intentando superar as probas que pensaches, tendo en conta que non podes tardar máis de 3 minutos en terminar. 

Imos establecer unha serie de puntos clave para esta fase do produto final. Tenas moi en conta á hora de levar á realidade o teu circuíto, e recorda asegurarte que cumpres todos os ítems da lista de cotexo.

1. Collede todo o material necesario para a construción das diferentes probas. Organizádeo e colocádeo nos lugares exactos para darlle forma e sentido ao circuíto.

2. Poñede a proba o circuíto. É totalmente indispensable que cada un dos membros do equipo sexa capaz de superalo, polo que as probas motrices que fagades deben permitir que, sexa cal sexa a capacidade de cada un/unha, exista unha forma de superalas con éxito.

3. Tendo en conta que debedes preparar un circuíto accesible para todo o mundo, será moi importante pensar de antemán as dificultades que poden xurdir e acordar, entre todos e todas, posibles solucións que serán explicadas aos compañeiros e compañeiras que vaian realizalo. 

4. Calculade o tempo. Anotade canto vos leva a cada un de vós facer o circuíto enteiro e, logo, apuntade a media do grupo. O tempo non pode superar os 3 minutos de duración. 

5. Se algunha persoa do grupo non pode superar algunha proba de ningunha maneira, ou ben, non consegue facelo antes dos 3 minutos, deberedes acordar as variacións necesarias para axustar o voso circuíto e deixalo listo.