Glosario

Afrontar

Definición:: Facerlle fronte a unha situación arriscada, complicada ou difícil para asumila ou buscarlle solución.
Exemplo:: Afrontar os retos físicos con determinación fortalece tanto o corpo como a mente.

Obstáculo

Definición:: Cada un dos elementos (valos, muros etc.) que as persoas participantes de determinadas probas atléticas deben superar durante o percorrido.
Exemplo:: Superou nove obstáculos antes de chegar á meta.

Parkour

Definición:: Actividade deportiva que se realiza en contornas urbanas que consiste na superación de obstáculos no camiño, como desniveis, escaleiras, bancos etc., mediante saltos, pinchacarneiros ou outros movementos.
Exemplo:: A través do parkour desafiamos os nosos límites para superar obstáculos.

Rubir

Definición:: Subir a un lugar, valéndose das mans e das pernas.
Exemplo:: As persoas son capaces de rubir ás árbores.

A vida e os obstáculos

Os seres humanos levamos toda a vida superando obstáculos. Dende que somos pequenos, aprendemos a gatear, a correr, a saltar e a rubir polas árbores… Cada vez que superamos un obstáculo, sentímonos máis fortes, máis áxiles e con máis confianza. Fainos crecer como persoas.

Pero non todos os obstáculos son iguais, hainos físicos e hainos mentais. Algúns poderémolos superar sós e para outros necesitaremos axuda. Algúns poderémolos evitar e outros non quedará outra que afrontalos.

Nesta situación de aprendizaxe, melloraremos as nosas capacidades físicas a través da corda e do parkour. Prepararémonos para poder superar obstáculos e discorreremos como realizalo de maneira creativa. Comeza... Saltando barreiras!