1 - Introdución

Descrición da unidade didáctica

Esta unidade denomínase Emprego das tecnoloxías da información e da comunicación. É recomendable que diariamente traballe con ela entre unha e dúas horas.

• Ademais, debe ter en conta as seguintes puntualizacións:
  • A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.
  • A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar.
  • Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.
• Logo de rematada a unidade deberá ser quen de:
  • Comprender e valorar a importancia das novas tecnoloxías na súa educación, a súa importancia no mundo laboral e na vida moderna en xeral.
  • Comprender textos propios da vida cotiá e das relacións sociais, como mensaxes de chat e correo electrónico.
  • Comprender textos do ámbito académico, atendendo especialmente aos de carácter instrutivo (webs educativas, informacións de dicionarios, glosarios e enciclopedias).
  • Aplicar correctamente os contidos básicos de ortografía: acentuación (II).
  • Empregar axeitadamente os contidos básicos de ortografía: h, b/v, c/z.
  • Coñecer a clasificación semántica da oración simple segundo diferentes criterios.
  • Recoñecer e usar coherentemente as perífrases verbais.
  • Coñecer a formación do galego e as etapas da súa historia social durante os Séculos Escuros ata o século XVIII.
  • Localizar en bibliotecas virtuais obras literarias pertencentes ao período estudado.
  • Coñecer e ler obras relacionadas cos grandes períodos e autores da literatura do Renacemento en lingua castelá.