2.13 Elementos fundamentais do relato literario (aspectos teóricos)

Cando estudamos o xénero narrativo, falabamos dos elementos fundamentais das narracións: personaxes, acción (presentación, nó e desenlace), espazo e tempo.

No relato literario un elemento fundamental é tamén a voz do narrador. Ás veces, este fala en primeira persoa; outras, en terceira persoa, sabéndoo todo da acción e dos seus personaxes... Nun relato literario, o narrador pode ser:

• Protagonista: cando o relato se narra en primeira persoa.

• Testemuña: cando o relato se narra, polo xeral, en primeira persoa. O narrador é testemuña dos feitos relatados.

• Omnisciente: cando o relato se narra en terceira persoa. O narrador sitúase fóra da historia e refírese a ela omniscientemente, sabendo todo sobre os personaxes.

• Observador: cando o relato se narra en terceira persoa. O narrador sitúase fóra da historia pero limítase a describir as accións dos personaxes sen ser coñecedor dos seus pensamentos, as súas emocións, etc.

• En segunda persoa: o narrador pódese dirixir ao protagonista da historia ou ben recorrer á estrutura epistolar.