1 - Introdución

Esta unidade denomínase A descrición. É recomendable que diariamente traballe con ela entre unha e dúas horas.

• Ademais, debe ter en conta as seguintes cuestións:

–      A unidade contén textos e exercicios en galego e castelán, separados en dúas partes ben diferenciadas. Ambas as linguas, xunto coa estranxeira, intégranse no ámbito da comunicación.

–      A unidade consta de dous tipos de textos ou contidos: uns que levan a etiqueta de "aspectos teóricos", que son os que debe comprender e memorizar, e outros que carecen desa etiqueta, que son os que debe ler, comprender e comentar (aparecen precedidos coa imaxe dun libro).

–      Os contidos e exercicios van clasificados en bloques ou partes, relacionados con distintos aspectos do estudo da lingua: comunicación oral, comunicación escrita, coñecemento da lingua, lingua e sociedade e educación literaria.

• Logo de rematada a unidade deberá ser capaz de:

–      Valorar a importancia da lingua oral como xeito de comunicación universal.

–      Identificar nun texto descritivo as características que o definen como tal.

–      Compor textos facendo descricións físicas e psicolóxicas de personaxes.

–      Compor enunciados e textos cunha cohesión adecuada.

–      Coidar a presentación formal de traballos e textos escritos, en soporte impreso e dixital.

–      Identificar e recoñecer familias de palabras regulares e irregulares en ambas as linguas.

–      Saber a función sintáctica da clase de palabra verbo nas dúas linguas do ámbito.

–      Recoñecer o suxeito, o predicado e os complementos da oración nas linguas do ámbito.

–      Manexar unha terminoloxía sintáctica básica.

–      Identificar os elementos fundamentais do relato literario.

–      Recoñecer algunhas das transformacións necesarias cando se adaptan textos narrativos para convertelos en guións de obras audiovisuais.