4.1. O booktrailer

Glosario

Booktrailer

Definición:

Vídeo de pouca duración no que se presentan os aspectos máis interesantes dun libro co obxectivo de animar a outras persoas a lelo. É un anglicismo formado mediante o substantivo book ("libro") e trailer ("avance", "anuncio").

Exemplo:

Decidín ler o libro O corazón de Xúpiter despois de ver o booktrailer que fixo unha lectora.

Código QR

Definición:

Un código QR ("que erre") é un tipo de código que se pode ler mediante un teléfono intelixente e que pode incluír diferentes contidos: unha páxina web, unha rede social, un correo electrónico...

Exemplo:

Consultamos o menú do restaurante escaneando o código QR que había na mesa.

Guión

Definición:

Texto no que se recolle o argumento e os elementos necesarios (texto, imaxes, son...) para planificar e realizar unha peza audiovisual (película, serie, programa de radio ou de televisión...)

Exemplo:

Antes de presentar o programa, o presentador estudou ben o guión.

Que é un booktrailer?

Un booktrailer é un vídeo de pouca duración no que se presenta un libro co obxectivo de animar a outras persoas a lelo.

Do mesmo xeito que o tráiler dunha película resume a súa a trama e crea intriga no público espectador, o booktrailer tamén sintetiza os aspectos máis interesantes dun libro e trata de espertar a curiosidade do público lector.

Para comprendelo mellor, amosámosche deseguido algúns exemplos:

Booktrailer do libro Meigas fóra!

Booktrailer do libro Zackarina e o Lobo de Area

Booktrailer do libro Frankenstein ou o Prometeo Moderno

Booktrailer do libro O país da choiva

Booktrailer do libro A casa do paralelo 54

Creamos un booktrailer

En grupos, ides realizar un booktrailer da obra que lestes e analizastes na fase anterior.

Este booktrailer engadirase tamén á revista, mediante un código QR.

O voso booktrailer terá unha duración de arredor de 2 minutos (máximo 3) e para realizalo seguiredes estes pasos:

1) Decisións iniciais

Entre todos os membros do grupo, acordade como será o voso booktrailer, que queredes transmitir e como o faredes: que textos incluiredes, que imaxes e que música...

Lembrade que o obxectivo principal é animar a outras persoas a ler o libro.

2) Guión

Coas decisións que tomedes, elaborade un guión no que se recollan os aspectos máis importantes do voso booktrailer: o texto, as imaxes, a música... Podedes empregar unha táboa coma a do exemplo:

Exemplo:

Parte

Imaxe / Vídeo

Texto (escrito ou oral)

Sons (música, efectos...)

Inicio

A portada do libro

Texto escrito:

Comeza a aventura...

Escóitase un galo cantar

3) Realización

Chegou o momento de plasmar as vosas grandes ideas no vídeo.

Escollede o programa máis axeitado para gravar e montar o voso booktrailer e mans á obra!

Consellos para realizar un booktrailer incrible

O bo, se é breve, dúas veces bo. O booktrailer non debe pasar moito dos dous minutos. Se dura máis tempo e ten demasiada información pode resultar aburrido e non animar á lectura.
Emprega frases breves, concisas e suxestivas. Se o texto aparece escrito, emprega letras grandes que se poidan ler ben desde calquera dispositivo.
Chama a atención de futuros lectores e lectoras dirixíndote directamente a eles e a elas. Exemplo: Que cres que ocorrerá? Corre á biblioteca para descubrilo!
Non esquezas incluír o título do libro e o nome do autor ou da autora. Podes indicalo ao principio ou ao final do booktrailer.
Emprega imaxes e música de dominio público ou con licenzas que permitan compartilos.

Lectura facilitada

O booktrailer ten que ser breve.

Non debe superar os dous minutos.

Se dura máis, poderíase facer aburrido.

Emprega frases breves.

Se hai texto escrito, usa letras grandes.

Fálalles directamente aos futuros lectores que estean mirando o booktrailer.

Non esquezas incluír o título do libro e o nome do autor ou da autora.

Podes dar estas indicacións ao principio ou ao final do booktrailer.

Emprega imaxes e música de dominio público ou con licenzas abertas.

Audio

Licenciado baixo a Licenza Creative Commons Atribución Non-comercial Compartir igual 4.0