1.1. Neste REA...

Neste proxecto imos crear unha revista de literatura e cultura galega para xente moza. Estas son as fases que imos seguir para conseguilo:

• Primeiro vas ler un libro de narrativa xuvenil en galego. Por grupos, teredes que escoller o libro que máis vos guste dunha lista que vos vai dar o voso profesor ou a vosa profesora.
• A continuación formaredes grupos segundo as vosas escollas e terás que reflexionar e intercambiar opinións sobre a lectura co resto de membros do grupo.
• Despois de analizar o libro, ides redactar unha recensión sobre el. A recensión ten que incluír:
  1. Unha breve traxectoria do autor ou da autora
  2. Un resumo
  3. A lista de personaxes principais e de personaxes preferidos
  4. Unha análise do espazo e do tempo
  5. O tipo de narrador
  6. Un comentario das ilustracións
  7. Unha opinión persoal ben argumentada
• Tamén teredes que redactar un novo texto a partir da obra que lestes. Este texto pode ser unha noticia, unha secuela, unha receita de cociña, un final alternativo...
• Finalmente, teredes que revisar e corrixir todos os textos que escribísedes.

Pero non todo vai ser escribir!

• Gravaredes un booktrailer sobre a obra duns dous minutos de duración. Este booktrailer engadirase á revista mediante un código QR.
• Escolleredes ilustracións e fotografías para acompañar os textos.
• Teredes que revisar, corrixir, maquetar e editar a revista.
• Unha vez estea publicada, contactaredes a través de cartas con centros educativos das comunidades autónomas nas que se fala catalán e éuscaro para divulgardes a revista.

• Expresar os teus gustos e intereses literarios e facerlle recomendacións lectoras a mozos e mozas da túa idade.
• Coñecer os gustos e intereses de xente nova coma ti.
• Poñer en valor a literatura infantil e xuvenil galega e darlle unha maior visibilidade.
• Coñecer as diferentes fases do proceso de creación de calquera obra escrita e poñelas en práctica para publicar a revista. Estas fases son as seguintes:
  1. Redacción
  2. Revisión
  3. Corrección
  4. Selección de ilustracións e doutro material gráfico ou multimedia
  5. Edición
  6. Maquetación
  7. Publicación
  8. Divulgación
• Analizar obras de narrativa xuvenil, recoñecendo as características principais do xénero e vinculándoas coa actualidade e con outras manifestacións artísticas e culturais.
• Achegarte a outras linguas da Península Ibérica, sobre todo ao catalán e ao vasco, coñecer a súa extensión xeográfica e aprender vocabulario e expresións básicas.
• Reflexionar sobre as vantaxes que nos dá a lingua galega para ler, entender, falar e escribir en portugués.

• Mellorarás a comprensión lectora e serache máis fácil entender textos escritos.
• Aprenderás técnicas para que os textos que escribas se entendan moito mellor.
• Aprenderás a gravar un booktrailer.
• Coñecerás outras linguas da Península Ibérica, saberás onde se falan e aprenderás a dicir cousas básicas.