Apóstrofo

Definición:

O apóstrofo é un signo gráfico que se emprega nas linguas románicas para indicar que desapareceu unha vogal ao entraren en contacto dúas palabras distintas. É importante non confundilo cun acento, xa que son signos diferentes. En galego úsase cando se escriben as preposicións de ou en antes do título dun libro.

Exemplo:

Gústanme moito os personaxes d’Un elefante na sala de estar, de Berta Dávila.

Argumento

Definición:

O argumento dun texto literario (un conto, unha novela...) é o que pasa na historia, o que lles acontece aos personaxes nun lugar e durante un tempo determinado.

Exemplo:

Ese conto ten un argumento sorprendente, nunca imaxinei que eses amigos descubrisen que en realidade eran irmáns.

Dígrafo

Definición:

Un dígrafo son dúas letras que sempre se escriben xuntas para representaren un único son.

Exemplo:

O dígrafo ch aparece en palabras como chorar, achegar ou moucho.

Multilingüismo

Definición:

O multilingüismo é a capacidade dunha persoa que coñece e pode usar moitas linguas. Tamén se coñece como multilingüismo a presenza de varias linguas nunha sociedade, nunha escola, etc.

Exemplo:

Nas sociedades actuais cada vez hai máis persoas multilingües que saben falar en tres ou mesmo en catro linguas distintas.

Romanización

Definición:

Chámaselle romanización á transformación cultural que sufriron os pobos conquistados polo Imperio Romano. Eses pobos non só incorporaron as leis e os costumes propios de Roma, senón que as persoas que os habitaban tamén empezaron a falar en latín. A partir dese latín xurdiron linguas coma o galego, o portugués, o castelán e o catalán, coñecidas como linguas románicas, ou linguas latinas.

Exemplo:

O galego deriva do latín, que chegou a Galicia por causa da romanización.