Contactastes coas asociacións da vosa vila, sabedes o que ides embalar e tedes pensado sobre os materiais que podedes precisar para o voso traballo?
Antes da fase final debedes ter todo preparado para que durante a realización do reto non haxa ningún problema, e estes son os pasos a seguir.
Probablemente tedes varias opcións, así que elixide co voso profesor ou profesora o obxecto co que ides traballar.
Unha opción son as asociacións sen ánimo de lucro ou centros especiais, coma residencias de maiores ou de educación especial da vosa vila.
De seguro alguén fai artesanía ou calquera produto que precise unha boa embalaxe.
Quizais no voso centro haxa un curso que estea a vender cousas para recadar fondos para algunha actividade, ou facedes algún agasallo cando veñen visitas.
A terceira opción é, simplemente, escoller obxectos que teñades á man, algún obxecto persoal que vos apeteza embalar.
Sabendo o obxecto que ides embalar, e tendo en conta o que sabedes sobre o refugallo, debedes decidir xunto ao profesorado o material que ides empregar para finalizar o reto.
Hai moito material ao voso redor. É importante que teñades en conta as necesidades de protección do obxecto e as vosas capacidades para manipular o material escollido. Non é o mesmo pregar un papel ou cartón que cortar madeira.
Coñecer as características dos materiais axudaravos a tomar a decisión correcta.
O cartón está feito por varias capas de papel xuntas. Podedes pregalo e cortalo sen dificultade, o que o fai un material perfecto para o deseño de embalaxes. É un material económico, resistente e lixeiro, dispoñible en diferentes grosores. E o máis importante, é 100% reciclable!
Seguro que tedes moitas caixas e pedazos de cartón no centro e na casa que podedes empregar para as vosas embalaxes. Tamén podedes preguntar nas tendas da vosa vila.
O cartón permítevos imprimir e debuxar logotipos e cores facilmente, e podedes escoller entre moitos tipos, coma o cartón ondulado, o cartón pedra, a celulosa moldeada, o cartón compacto ou o couché.
O papel de embalar ou papel Kraft podedes empregalo para a embalaxe ou para o recheo. Moitas bolsas que tedes na casa son deste material.
Queredes unha pista moi útil? En todos os centros hai unha trituradora de papel na secretaría ou conserxería. Pedide se vos deixan os restos do papel triturado. É perfecto para o recheo ou a protección!
A madeira é un material de orixe natural, polo tanto, ecolóxico. É moi resistente aos golpes e aos cambios climáticos, por iso é moi empregada no transporte de cousas que precisan protección.
Malia as súas vantaxes, se escolledes este material, tedes que contar con ferramentas especiais para manipulala. Preguntade ao profesorado se ides dispoñer do taller de tecnoloxía!
Un tipo de madeira moi útil é a coñecida como madeira de balsa. É moi fina, lixeira e fácil de cortar. As caixas de froita son deste material.
O plástico é un dos materiais máis empregados pola súa versatilidade, lixeireza, capacidade de manipulación e de protección fronte a factores externos como a poeira ou os líquidos. Mais sabedes que é un material moi contaminante.
Non por isto o rexeitaredes... Podedes facer que sexa de utilidade no voso proxecto, poñendo da vosa parte na cadea de refugallo.
As espumas de polistireno o polietileno son empregadas como protección e illante térmico. Malia o sinxelo de cortalas e crear formas con elas, non as ides empregar porque son materiais moi tóxicos.
Aínda que non os ides usar pola dificultade á hora de manipulalos, outros materiais empregados para embalar obxectos son o vidro, o aceiro e outros metais.
Mirade ao voso redor e empregade a imaxinación. Hai moitas cousas que poden servirvos neste proxecto: restos de teas e roupa, la e fitas para os peches e as etiquetas, recheo de bonecos para a protección... calquera cousa pode ser útil para completar as vosas embalaxes!
Partindo dos obxectos e dos materiais que escollestes, concretádeos en deseños finais que sexan moi parecidos ao que realizaredes finalmente, estudando ben o obxecto escollido, o seu uso e as súas características.
Nesta fase debedes concretar as formas, tamaños e cores do que será a embalaxe final.
Lembrade que os deseños finais non deben ser demasiado complicados, pois é importante ter en conta o tempo do que dispoñedes para levalos a cabo.
Partindo dos obxectos e dos materiais que escollestes, concretádeos en deseños finais.
Estudade ben o obxecto escollido, o seu uso e as súas características.
Nesta fase debedes concretar as formas, tamaños e cores do que será a embalaxe final.
Lembrade que os deseños finais non deben ser demasiado complicados.
Con todo xa decidido, é importante que vos organicedes moi ben dentro de cada equipo para repartir as tarefas a levar a cabo: quen deseñará cada cousa, quen manipula o material, quen coordina o equipo...
Para iso debedes imaxinar como se vai levar a cabo o proceso final e adiantarvos aos problemas que poidan presentarse.
Se cada un ten claro o que debe facer, todo será máis doado, rápido e sinxelo.
Xa tedes todo preparado? Nese caso chegades á parte máis divertida: a realización do reto!
Con todo xa decidido, é importante que vos organicedes en cada equipo para repartir as tarefas.
Quen deseñará cada cousa?
Quen manipula o material?
Quen coordina o equipo?
Para iso debedes imaxinar como se vai levar a cabo o proceso final e adiantarvos aos problemas.
Se cada un ten claro o que debe facer, todo será máis doado, rápido e sinxelo.
Xa tedes todo preparado?
Chegades á parte máis divertida: a realización do reto!
Licenciado baixo a Licenza Creative Commons Atribución Non-comercial Compartir igual 4.0