Agora chegou o momento de procura e investigación:

O deseño de packaging é unha excelente forma de combinar creatividade, xeometría e propósito social. Agora, é o momento perfecto para poñer en práctica o que aprendestes sobre os polígonos e o sistema diédrico.

Ides explorar como podedes usar estes conceptos para desenvolver un deseño innovador e estruturado para o voso packaging.

Primeiro, imaxinade que o packaging que ides crear é unha especie de "envoltura" tridimensional para o produto. Aquí é onde os polígonos entran en xogo. Como xa sabedes, os polígonos son figuras planas que teñen lados rectos, e cada unha destas formas pode converterse nunha das caras dun poliedro.

Un poliedro é unha figura tridimensional formada por varios polígonos, e estes polígonos actúan como as caras que definen a estrutura do poliedro.

Pensade como os poliedros poden ser usados no deseño de packaging.

Poderiades deseñar unha caixa que, por exemplo, teña a forma dun cubo, unha pirámide ou mesmo unha figura máis complexa coma un octaedro.

Cada unha destas formas está composta por diferentes polígonos, coma triángulos, cadrados ou rectángulos. Aquí é onde entra a relación entre os polígonos e os poliedros: os polígonos son as caras que fan posible que o poliedro teña a súa forma tridimensional.

A unión de varios polígonos de como resultado un poliedro, polo que é imprescindible que as medidas dos lados adxacentes sexan as mesmas. Pode parecer complexo, pero en canto empecedes a traballar coas mans comprenderedes que é sinxelo.

Se o que estades a facer é debuxar os diferentes polígonos que compoñen o poliedro, poderíase dicir que estades facendo o desenvolvemento do poliedro.

O seguinte paso é usar o sistema diédrico para representar esas formas en dúas dimensións. O sistema diédrico é unha técnica de proxección que che permite visualizar como se verían esas figuras tridimensionais nun plano, e é clave cando se quere representar obxectos 3D nos deseños 2D.

Empregando este sistema, poderedes debuxar as vistas do voso poliedro, é dicir, as diferentes perspectivas do obxecto. Isto vaivos axudar a crear un deseño máis claro e preciso.

Por exemplo, se estades a deseñar unha caixa en forma de cubo, poderedes representar as súas diferentes caras usando vistas frontais, laterais e superiores, o que vos permitirá entender mellor como se vai ver o voso deseño desde diferentes ángulos.

A partir de aí, podedes crear un patrón que logo se converterá no deseño final do packaging, con todos os detalles, cores e imaxes que representen o produto asociación ou entidade que decidades.

Entón, o que podedes facer agora é mesturar os vosos coñecementos de polígonos e do sistema diédrico para crear un deseño de packaging único e funcional. Pensade en como as formas xeométricas poden influír na estética e a funcionalidade do voso deseño, e como as vistas en sistema diédrico poden axudarvos a plasmar esas formas no voso proxecto final.

Deixade voar a vosa creatividade!