Os materiais

Primeiro de todo, prepara o teu espazo de traballo. Lembra empregar materiais de refugallo, na medida do posible.

Para este traballo vas precisar: 

1. Unha cartolina ou papel de calquera cor como soporte.
2. Restos de papeis ou cartolinas, poden ser de revistas, restos de papel de agasallo... o que atopedes!
3. Lapis e goma.
4. Tesoiras e pegamento.
5. Regras.
6. Para a cor podedes empregar lapis de cor, rotuladores ou témperas.
7. Pinceis, esponxas e/ou cepillo de dentes de refugallo para as texturas.

Recorta e clasifica

Para comezar, corta formas xeométricas o máis variadas posibles co papel de refugallo.

Unha vez recortadas, en grupo, observade o resultado e tentade atopar un xeito de clasificalas: teñen lados rectos ou curvos?, o número de lados, é o mesmo?, observade os ángulos, son do mesmo tipo?, coñecedes o nome dalgunha forma? 

Separade as formas segundo eses criterios.

Que e que...

Cando teñas as formas separadas por tipos, segundo os criterios escollidos, tedes que diferencialos.

Para isto empregarás a cor, por exemplo: os que sexan polígonos cóncavos, de cor liso, os que sexan convexos, con texturas.

Usa a túa creatividade!

Constrúe mosaicos como os de Roma

As nosas formas serán as pezas do noso mosaico. Agora, escolle un papel ou cartolina como fondo, dunha cor ou textura diferente ás formas para que destaquen.

Pega as formas, encaixándoas entre si coma un mosaico. Lembra deixar espazo entre forma e forma para que destaquen.

Comparte o teu traballo co resto do grupo. Serán quen de nomear cada forma?

Que materiais precisas?

1. Cartolinas ou papel.
2. Tesoiras e pegamento.
3. Lapis e goma
4. Regras e compás.

Debuxa e recorta

Se xa tes todo o material é hora de comezar.

Debuxa diferentes formas poligonais (triángulos, cadrados, círculos...) na cartolina ou papel que elixades e recorta.

Unha vez que teñas diferentes formas ordénaas de maneira que podas crear unha cidade lineal, coma se fosen edificios aliñados nunha rúa. 

Constrúe 

Cando teñas todas as formas preparadas é o momento da montaxe.

Pega as formas no lugar adecuado para formar unha liña de "edificios". Podes xogar con diferentes tamaños e cores para facela máis interesante. 

Reflexiona

Cando teñas a cidade rematada será o momento de compartila co resto da clase.

Pensade como os diferentes polígonos se combinan para formar unha cidade e como cada forma representa un edificio único nunha liña urbana.

Ademais, trata de identificar os diferentes ángulos que forman as formas xeométricas entre elas se é que existen! 

Saberiades dicir se o resultado da cidade é a planta, o alzado ou o perfil da mesma?